Nengah pemujur sereta pemandai besekula, anak kitai muntang agi napi pemar pengidup jemah ila
KAPIT: Menteri Pemansang Tanah Sri Datuk Amar Dr James Jemut Masing madah, penyulut enggau pemujur ba pelajar sekula diatu sebengkah ari singkang kitai nuju pemansang dalam pengidup jemah ila.
“Penyulut sereta pemujur kitai ba pelajar sekula diatu, sebengkah ari singkang kitai ulih ngemansangka pengidup sereta bansa diri bechuntoka bansa bukai dimenua tu kelebih agi peranak menua di pesisir,” ku iya.
Iya mansutka jaku nya lebuh bejadika ‘Biro Pendidikan –Jelajah Kawasan Sentuhan Kejayaan’ke diatur ba sebengkah hotel ditu kena Hari Minggu tu tadi.
Program nya digulu Raban Indu parti PRS di serata nengeri Sarawak ke diketuaika Senator Datuk Doris Brodie ke mega Ketuai Indu PRS.
“Seharitu, ‘Biro Pendidikan –Jelajah Kawasan Sentuhan Kejayaan’chukup manah. Biro Indu PRS udah bejalai ngagai mayuh rumah panjai meri jaku peransang ngagai peranak ke diau di menua pesisir awakka nganjung anak sida besekula. Enti nadai ngembuan pemandai sekula, anak kitai enda ulih nyingkang mansang baka bansa bukai.”
“Enti kitai deka nanam padi, tanam meh nyentukka ungkup setahun. Enti deka nanam kayu, tanam meh ungkup sepuluh taun. Pia mega enti kitai ka nyadi mensia ke ngembuan pemandai besekula bebendar, kitai patut belajar sebaka enggau belajar seratus taun,” ku iya.
Iya muji penyiru raban Indu PRS ke meri sukung ngagai nembiak menua pesisir sereta nulung nunjukka penguntung ngembuan pemandai dalam pengawa sekula.
“Kemayaharitu, ukai semina lambang parti PRS udah beganti, tang lambang PBDS mega udah betukar. Lambang nya dikena ngenanka tanah kitai. Tang diatu kami nukar lambang nya ngagai sekeda pengawa penyungkak pemanah besekula.
“Nya meh pekara ke patut dikemeratka kitai di menua tu. Diatu penyenang enggau pemansang dalam pengidup ukai bepanggai ba penegar kitai miau duku tauka ngayun kapak ba umai tauka kebun baka kelia. Tang pemujur pengidup kitai mensia dikenukuka nengah pemandai enggau penyulut kitai dalam pelajar sekula,” ku iya.
Masing mega madah, Datuk Doris Brodie ke mega Ketuai Indu PRS udah dichiri nyadi Sapit Presiden Senat Parlimen Malaysia.
Nangkanka nya, iya ngelalau raban bansa Iban lebih agi orang Indu anang jauh tinggal penemu enggau pemansang ari bansa bukai.
Kelimpah ari nya, Senator Datuk Doris mega madah, tuju ke bendar ‘Biro Pendidikan –Jelajah Kawasan Sentuhan Kejayaan’ke dipenyadi dalam bulan Jun taun tu tadi kena muka runding raban bansa Iban ke diau di menua pesisir ngambika seruran belematika pemanah enggau penguntung ngembuan tikas pelajar ke tinggi sereta ngembuan mayuh pengelandik dalam pengawa sekula.
“Enti nadai pemandai, kitai nadai jalai kena ngemanahka tikas pengidup sereta enda ulih ngasaika pengidup ke nyamai ke ngujungka kitai jauh tinggal pemansang enti dibandingka enggau raban bansa bukai,” ku Doris.
Sama bisi datai ba program nya, Sekretari Politik Kepala Menteri Sarawak Umis Tujoh enggau Wilson Nyabong, DO Pelilih Kapit Elvis Didit, Tuai Kaunsil Opis Pelilih Mit Kapit Philimon Nuing, Temenggong Tan Kian Hoo, Pemancha Yong Thu Fook, Kapitan Neo Kee Hui sereta lebih seratus lima puluh iku raban bukai ke bisi ngulu program nya.