Dikarang Jacqueline David //
Pemansang dudi hari bepelasarka pengelandik sereta penau mensia mayuh dalam bidang sains enggau teknologiKUCHING: Bala nembiak sekula menua pesisir dipeda kurang rinduka sebjek Sains enggau Matematik ti diajar dalam jaku English lalu ngujungka sida kurang penau enggau pengelandik dalam dua bengkah sabjek nya.
Kepala Menteri Datuk Patinggi Tan Sri Adenan Satem madah, kebuah sida (nembiak) kurang pengelandik nyangka ketegal polisi jaku Bahasa Melayu (BM) digaga nyadi jaku ke dikena ngajar enda engkeman lebuh dikena ngajar penemu saintifik.
Dalam taun 2003, polisi ngajar dua iti sabjek tu diubah ngagai jaku English dipungkal ex-Menteri Besai Tun Dr Mahathir Mohamad, laban beratika nembiak sekula di menua tu ke kurang landik nguna jaku English.
Udah nya, taun 2009 Opis Menteri Pelajar (KPM) mutuska ngajar sabjek Sains enggau Matematik diajar dalam jaku English, lalu asil pansik mandangka pengajar enggau nembiak sekula di menua pesisir kurang amat nyulut dalam dua iti sabjek tu.
“Bala pengajar mega enda entu ulih ngajar dua iti sabjek tu enggau nyemetak dalam jaku English, lalu ngujungka bala nembiak sekula nadai pengerindu dalam sabjek Sains enggau Matematik.
Aku endang nyukung pengawa ngajar sabjek Sains enggau Matematik ngena jaku English laban mayuh pekara digaga ngena jaku English entara komuniti saintifik di dunya,” ku Adenan.
Teks Adenan ke nyebut munyi nya dibacha Menteri Muda ba Opis Kepala Menteri (Promosyen Pelajar Teknikal) Datu Len Talif Salleh ba atur pengawa ‘16th International Organization for Science and Technology Education Symposium Borneo (IOSTE) 2014’ di sebengkah hotel ditu, kemari.
Nya alai, Adenan madah, ngarapka bisi pemutus ulih digaga nengah simposium tu bekait enggau pelajar rampa menua sereta enti ngajar sabjek Sains enggau Matematik diajar dalam jaku English nengah jalai ke patut.
Iya madah pemansang dudi hari bepelasarka pengelandik sereta penau mensia mayuh dalam bidang sains enggau teknologi.
“Nya alai, enda ulih dikeenggai ke kitai pemerat pengawa pelajar, pengawa latih sereta ngerembaika pengawa ngajar Sains enggau Matematik.
Kena matak pengerindu bala nembiak sekula dalam sabjek Sains enggau Matematik ukai pengawa ke muntang,” ku iya serata minta saup ari ejensi perintah, palan pelajar industri enggau NGO baka IOSTE.