KUCHING: orang ke bedaja di Pasar Tamu Dayak di Taman Megah Ria, Masai Johor nerima berita manah beserimbai enggau pengerami mantar Hari Malaysia ti ke-51 minggu nyin tadi, madahka palan endur sida bedaja nya deka dikemanah sereta beperabung, diungkupka Opis Kandang Nengeri Johor Bahru Tengah (MPBJT), enda lama agi.
Ungkus belanja RM250,000 deka diberi dikena nyikap sereta ngemanahka palan bedaja nya. Palan nya ila deka meri mayuh penguntung ngagai raban orang bedaja enti udah tembu ila. Ukai semina ngelindung sida ari panchar mata panas tauka ujan tang meda deka nyendiaka palan ke chukup besai sereta likun dikena sida bejalaika pengawa sida. Pasar ke tampak dikelala enggau nama Pasar Borneo Johor nya dipeda majak tuai sereta luya.
Berita ke madahka palan bedaja nya deka digaga dipansutka maya pengerami makai malam beserimbai enggau pengawa mantar Hari Malaysia ke diatur raban Gerempung Borneo Johor enggau Kelab SPDP Johor ba palan bedaja nya kena 15 September tu tadi.
Sapit Sekretari Khas Parti Demokratik Progresif Sarawak (SPDP) Datuk Paul Igai, ditanya raban pemberita The Borneo Post , projek nya deka tembu ba ujung taun tu.
“Tu keterubah kami ngatur pengawa begulai enggau ‘Anak Borneo Johor’ beserimbai enggau pengerami Hari Malaysia ti ke-51. Kaunsil Pelilih Menua Johor madahka ungkus belanja RM250,000 dikena ngaga palan nya udah dikemendarka Menteri Besai Johor,” ku iya.
Dipelabaka urung 40,000 ribu iku raban bansa Dayak diau sereta bekereja di nengeri Johor nyengkaum sekeda di Pasir Gudang enggau Masai. Sida tu datai ari nengeri Sarawak pindah lalu nguan nengeri Johor rambau adat bejalai dalam taun 1990 menya. Raban Dayak ke diau di nengeri nya ukai semina bekereja tang mega bejalaika pengawa dagang sida baka muka mayuh bengkah kedai.
Lebih 2,000 iku mensia datai ngulu pengerami makai malam mantar Hari Malaysia diatur nya. Ba pengerami nya, pengawa ngitang menira menua Malaysia ari raban anak mit ‘Anak Borneo Johor’bisi dipajalaika.
Pengerami nya dipenjadi Kaban Parlimen Mas Gading, Anthony Nogeh Gumbek ke ngarika Presiden SPDP Datuk Seri Tiong King Sing.
Pengudah pengerami nya, lebih 300 iti borang SPDP disuaka ngagai Nogeh sereta dikemataka Ingai.
Sama bisi ngulu pengerami nya Pemesai Khas Menteri Besai Johor R Sabaphaty ke mega Chairman Parti MIC Pasir Gudang sereta Chairman MCA Pasir Gudang Tan Cher Puk enggau raban parti UMNO Pasir Gudang.
Igai mega ngelalau raban Dayak ke diau sereta gawa di nengeri Johor, seruran nitihka atur perintah nengeri nya sereta bejalaika pengawa sida enggau manah.
Kelimpah ari nya, pengerami makai malam mantar Hari Malaysia ti ke-51 ke diatur raban Gerempung Borneo Johor enggau Kelab SPDP Johor nya mega bisi ngatur sekeda pengerami baka tanda enggau muzik asal, cabutan tiket betuah sereta diperindang enggau seiku artis pemerindang ari menua Limbang, Suzie Kay.
Suzie madahka pengaga diri pengudah nerima awak merindang sereta ulih betemu enggau raban bansa Dayak ke diau di nengeri Johor.