SARIKEI: Seiku lelaki beumur urung 30 taun gawa nyadi mekanik ba sebengkah bengkel ditu ditemu parai di Jalai Kubu Lama enda jauh ari sebuah tepikung di Nanga Sungai Nyelong, tumu pagi kemari.
Bangkai niang ditemu mensia mayuh gegaring telantang semina ngena baju pandak enggau betanchut sintak ba tisi mija enda jauh ari sebuah tepikung.
Pengudah tepedaka bangkai lelaki nya orang periman terus madah ngagai polis.
Raban polis berumban ngelawa palan nya lalu bejalaika pansik.
Berebak enggau nya, apai niang ke beumur urung 60 taun lebuh ke dirandau madahka niang seiku anak tuai ari lima iku diri menyadi.
“Kira pukul 2 lemai ensana (Hari Minggu), niang bisi dibai kaling iya bejalai, tang udah nya iya lalu nadai pulai ke rumah.
“Aku nerima kanggau ari polis lalu datai ngagai palan penusah nyadi awakka ulih ngenukuka bangkai orang ke dipelabaka anak aku.
“Pengudah datai ba palan nya, aku tepedaka bangkai nya endang amat anak tuai aku,” ku apai niang enggau ati sinu.
Sapit Kepala Polis Pelilih (KPD) Sarikei, DSP Dominic Josip Nyarui lebuh dirandau ngenukuka sida bisi nerima ripot bekaul enggau penusah nya.
“Bepelasarka pansik tumu, polis bisi tepedaka bekau rajai ba tisi mata niang Paw Yeow Wei, ke ngembuan adres di Batu 6 1/2, Jalai Repok.
“Polis ngumbai kes tu mati ngenyit. Taja pia kes agi dipansik,” ku Dominic.
Iya madah, bangkai niang udah dibai ngagai Sepital Sarikei.