LUBOK ANTU: Kaban Kunsil Nengeri (ADUN) Engkilili Dr Johnnical Rayong Ngipa madahka diri deka nguji mutarka isu Opis Pengemata enggau Pengintu Tanah Sarawak (SALCRA) ke deka ngurangka penyampau pekereja kilang sawit di Merindun.
Isu deka ngurangka penyampau pekereja kilang sawit nya dipansutka SALCRA apin lama ke udah berindik ari kilang sawit Merindun ke dipenggi SALCRA nya angus kena 31 Ogos tu tadi.
“Aku nguji mai pekara tu ngagai piak atas ngambika penanggul tu ulih diputar sereta bisi jalai pemutus ke manah,” ku Dr Rayong.
Iya madah munyi nya rambau Program Tuai Begulai Enggau Rayat ke diatur di Rumah Kaunsilor Meritin, Merindun, Lubok Antu, ditu empai lama ke udah.
Nangkan ke nya, Dr Johnnical Rayong ngelalau rayat di nengeri tu ngambika anang mudah tekuing runding ketegal ulah sekeda orang ke nguji mambarka penyerakup politik di nengeri tu.
Iya madah, penyerakup politik ba semua rayat patut tegut dibaruh perabung serakup parti Barisan Nasional (BN) ngambika Sarawak majak terus dikemansang.
Iya madah, BN bejalaika tanggungpengawa ke chukup nyulut dalam ngatur pemansang nengeri Sarawak jam ke diatu.
“Aku ngarapka semua rayat kelebih agi di Engkilili terus ngenanka penyerakup politik dalam BN,” ku iya.
Rambau pengerami nya lebih 500 iku mensia mayuh bisi datai ngulu pengerami.