Dennis: Sukung atur pemansang ti dipejalaika perintah

0

MIRI: Rayat menua pesisir di pelilih mit Baram dilalau ngembuan runding ke positif seraya nerima perambu pemansang ti dipejalaika perintah di menua nya kena nyungkak pengidup rayat.

Kaban Kaunsil Nengeri (ADUN) sitak Telang Usan Dennis Ngau mansutka lalau tu ngagai rayat di menua nya beserimbai enggau pengerami lumba enggau main sekula primari renggat Zon Pa’a ke diatur ba SK Long Anap, ditu.

Iya minta rayat di menua nya seruran meri sukung ngagai atur pemansang ke dipejalaika perintah berindik ari mayuh sekula di sitak Baram ka agi jauh tinggal pemansang enti dibanding enggau sekeda sekula di serata nengeri tu.

“Kitai patut merati sereta nerima pekara nya lalu nyadika sebengkah ari pengeransing kena ngemansangka diri ba pengawa sekula sereta pemansang bukai. Anang sekekali lemi runding tang, keringka penemu kena napi pemerinsa laban ari nya kitai ulih mupuk mansang nitihka singkang bansa bukai,” ku iya.

Kelimpah ari nya, Dennis mega ngelalau raban apai indai enggau nembiak sekula awakka seruran belamatika pemanah guna ngembuan pengelandik dalam sekula laban nengah chara nya pengidup sida ulih berubah lantang sereta badu agi ngasaika pemerinsa.

“Kitai patut ransing ngulihka pemandai sereta anang mantul ngapa. Enggau pemujur pengawa sekula, kitai mensia ulih mansang, enda tinggal jauh ari raban bansa bukai ke endang lama udah mansang,” ku iya nandu.

Dennis pechaya, nembiak sekula ulih ngubah nasit rayat di menua nya sereta nengah pemandai sekula dikena ngemanahka tikas pengidup sida kelimpah ari ngangkatka sosio-ekonomi diri nitihka menua bukai.

Nangkanka nya, Dennis minta raban apai indai nyikap diri enggau runding ke manah sereta meransang anak sida awakka ransing besekula ngulihka pemandai dikena napi pemansang dunya kemaya hari tu.

“Kitai enda tau ngeletakka tanggungpengawa nyaga sereta ngelalau anak ngagai raban pengajar sekula aja, tang tanggungjawap nya mega sebengkah ari pematut ke patut dikembuan raban apai indai,” ku iya.

Ba awak bukai, kitai patut seruran nyikap diri nerima pemansang sereta ngubah runding ngagai tikas ke manah agi. Seliahka penemu ke enda menuku.

“Kemeranka runding ke manah nerima jaku lalau sereta ransing mutarka penanggul ke ngeruga diri,” ku iya.

Dennis mega ngelalau raban pengajar sekula di menua nya awakka seruran bejalaika pengawa ngiring sereta ngajar nembiak enggau naka pengeransing.

Bela bisi ngulu atur pengawa nya, Kepala Pengajar SK Long Anap, Belawan Sirang enggau Tuai Rumah Long Anap, Anthony Belarek.