KPPs Siri 9 kena 11-12 Oktober, ngembuan 11 woksyop, bejuraika empat keretas kereja

0

KUCHING: Bisi 11 woksyop enggau empat keretas kereja deka dipejuraika maya Konvensyen Pendidikan Pra-sekolah (KPPs) Siri 9 ti diatur kena 11 nyentuk 12 Oktober tu.

Nitih penerang ari Menteri Muda Pemansang Ruang Bilik enggau Pelajar Tumu Anak Mit Rosey Yunus, konvensyen ti berambaika leka jaku ‘Thinking Thinking: Inculcating Thinking’ deka diatur ba Imperial Hotel ditu.

“Kena 11 enggau 12 Oktober tu urung 450 iku pengajar pra-sekolah serata Sarawak deka ngulu Konvensyen Pendidikan Pra-sekolah Siri 9 nya.

“Maya tu ila bisi 11 woksyop enggau empat keretas kereja deka dipejuraika (nyengkaum ‘Understanding How Children Think; Thinking Component in the Pre-school Curriculum; Pedagogical Component Inculcating Thinking Culture Among Pre-school Teachers & Developing Thinking Skills Among Children in the Classroom),” ku iya dalam aum pengarang berita.

Dulu ari nya iya nerima penemuai basa ari raban Universiti Pendidikan Sultan Idris (UPSI) Perak ba Bilik Baum Opis Menteri Pengintu Pengelantang Pendiau, Orang Indu enggau Pemansang Ruang Bilik di Bangunan Baitulmakmur, kemari.

Entara pekara ke bisi dipejurai maya woksyop nya, ‘Inculcating Thinking Culture Among Teachers: Creative and Critical Thinking,  Reflective Practices’ sereta ke bukai.

Konvensyen nya diataur Majlis Pembangunan Pendidikan Awal Kanak-Kanak Sarawak (MPAKS) dikena ngangkatka profesyenalisme pengajar pelajar tumu anak mit di menua tu.

Nambahka nya konvensyen nya mega dikena ngangkatka pengelandik enggau penemu pengajar pasal pelajar tumu anak mit ngambika ulih nempa modal mensia ti bekualiti.

Sama bisi ngulu aum pengarang berita nya kemari, Direktor Opis Pengintu Pengelantang Raban Bansa (JKM) Abang Shamsuddin Abang Seruji enggau ke bukai.