SARIKEI: Program Membantu Rakyat (Membara) ke diatur JASA begulai enggau ejensi perintah sereta gerempung ukai dikuasa perintah (NGO) ngembuan juluk deka mantu peranak menua tu nyungkak penatai pemisi sida.
Pemesai Opis Ehwal Khas (JASA) Bagi Menua Sarikei Ahmat Adai madah, program nya ngemeratka pengelandik ngemansutka produk ari menua tu ti bepelasarka asil pengelandik jari ke tau nyadika penambah penatai pemisi bala penyereta.
“Taja pia, kami patut berani ngaga ubah ngambika ulih matak pengerindu mensia mayuh. Udah datai ba maya iya industri tu disaup ngambika ulih ngemansutka penatai pemisi ngagai sesebuah ruang bilik,” ku iya.
Ku iya madah, program nya mega nyaup perintah munaska penanggul orang umang.
Iya bejaku munyi tu lebuh bejadika Seminar Kraf Tangan Jalinan Wanita Membara di Rumah Kuning, kemari.
Program nya udah dipasuk seraban 70 iku bala indai orang sereta digulu Pengulu Bidai Gisang.
Ku Ahmat, program nya diatur dikena meransang raban indu ngambi malutka diri ba pengawa bepelasarka asil pengelandik jari seraya ngerembaika industri nya ngambi ulih nyadi sebengkah pemansut penatai pemisi ti nguntungka.
Ku iya baru, pengawa asil pengelandik jari ti tau digaga sida baka asil pengelandik jari ari buluh laban peminta ba produk nya tinggi.
Ku iya, asil pengelandik jari nya ukai semina manah dipeda tang bisi peminta ari raban orang ti ngemeranka dagang hotel, ngias kebun enggau opis.
“Naka ke diatu asil jari pengukir ari menua tu udah matak pengerindu mayuh bengkah raban, lalu nya ngelaika pengelandik sida begagaka asil pengelandik jari,” ku iya.
Berebak enggau nya, Pengulu Bidai muji insiatif JASA ngatur program nya.
Ku iya, program ke baka nya patut dipajak dikena meransang raban indu ke lebih agi bala indai orang ke nadai pengawa bukai.