Dikarang Judan Bungap //
Jaku ADUN Daro nya enda amat, minta piak ti bekuasa nyengkaum KM datai meda penanggul kami
SIBU: Peranak menua di Sungai Lengan sekali agi enda setujuka penerang ke dibantai Kaban Kaunsil Nengeri (ADUN) sitak Daro Dr Murni Suhaili laban iya enda mantaika pekara ti amat maya ngatur randau begulai enggau 14 iku tuai rumah di baruh sitak nya, empai lama ke udah.
Bejaku ngarika peranak menua dia, David Majang Sang madah, projek ke disebut Dr Murni semina mungkur sebuah rumah panjai aja.
“Iya enda nyaut utai ke disebut kami ngelama tu.
“Iya nadai nyebut projek jalai ba seberai SK Sungai Lengan ke empai tembu kenyau taun 2008 suba nyentuk ke diatu.
“Kami enda nemu sekalika iya enda meretika penanggul kami ditu tauka iya deka nyeliahka diri ari nyaut tanya kami,” ku iya madah ngagai pengarang berita, kemari.
David madah, diatu semina Rumah Liang enggau SK Sungai Lengan aja udah ditampung jalai alun tang projek jalai (ba seberai) pemanjai satu kilometer empai kala berengkah digaga taja pan projek nya kala diperambu deka digaga ari taun 2008 suba.
Jalai nya ku iya, deka mai penguntung ngagai enam buah rumah panjai iya nya, Rumah Seli, Rumah Lanting, Rumah Igat, Rumah Bungkok, Rumah Jimmy enggau Rumah Jingga.
Nambahka nya, projek jalai tu mega patut ditampung ngambi nguntungka dua buah da rumah panjai di baruh sitak Daro iya nya Rumah Guang ba Nanga Sungai Lengan enggau Rumah Kaming.
“Iya mega enda nyebut Rumah Guang ba Nanga Sungai Lengan ke empai datai karan taja tujuh iti tiang karan udah dientak dia kenyau urung taun 80 suba.
“Ukai semina nya, jelatung ba pendai sekula endang ari suba agi ngena jelatung batang. Kilah ensana mega bisi nembiak labuh dia tang benasit bendar nadai utai ke jai ari nya udah nyadi.
“Tang ngambika ADUN nya nemu, kira lebih 10 taun sebedau tu, bisi dua iku nembiak bebadi lemas ketegal jelatung batang tu,” ku iya nandu.
David mega balat ngenggaika jaku Dr Murni ti madahka sepenyampau RM200,000 udah diagih kena melakin jalai ngelawa SK Sungai Lengan ti bela dijantil ngagai Rumah Liang.
“Nyentuk ke seharitu jalai 900 meter nya agi bebatu.
“Baka ni iya tau madah jalai nya udah dibelakin, kami enda nemu,” tandu iya.
Berebak enggau tu, David madah, iya enda pechaya bisi 14 iku tuai rumah datai ngulu randau ke diatur Dr Murni kena 23 September tu tadi.
Ku iya, sekeda ari sida ti datai maya nya ukai tuai rumah munyi ke dipadah Dr Murni.
“Ba surat berita kena 24 September tu tadi, Dr Murni madahka diri bisi berandau enggau 14 iku tuai rumah ari kandang menua Sungai Lengan, Nanga Mawan, Tanjung Keling enggau Singat.
“TR Dee, TR Ligong enggau TR Empanak nya ukai tuai rumah. Kami enda nemu nama kebuah sida tau dikangau nyadi tuai rumah,” ku iya nandu.
Berindik ari pekara nya, David minta opis ti bekaul nyengkaum Kepala Menteri empu datai ngelawa menua sida nentuka pengamat jaku ke dipansutka Dr Murni nya.
“Kami enggai dipadahka orang nempa cherita bula. Nya alai kami berani ngangauka sapa ti bekaul nyengkaum Kepala Menteri empu datai meda nama batang penanggul ke bisi nuntung kami.
“Kami mega andal projek jalai satu kilometer nya ulih digaga enggau lengkas kelimpah minta jematan bela digaga dikena nampung jalai nya ngagai seberai,” pia ku iya ngujungka randau.