Program ASB ari perintah ngelempungka tating pengidup orang umang

0

SARIKEI: Seraban 443 iku orang ke umang di serata nengeri tu udah diberi bantu RM5,000 seiku ke alai duit nya dideposit ngagai Amanah Saham Bumiputera sida.

Bantu nya diagih perintah nengah program Amanah Saham Bumiputera Sejahtera ari baruh Opis Menteri Pemansang Menua Pesisir enggau Kandang Menua ngambika nyadi sebengkah ari jalai penatai pemisi orang ke umang nengah dividen ASB, pia ku Sapit Menteri nya,Datuk Alexander Nanta Linggi.

Nanta bejaku munyi tu ngarika Sapit Kepala Menteri, Tan Sri Datuk Patinggi Alfred Jabu Numpang lebuh bejadi pengerami nyuaka bantu nya ungkup bagi pelilih tengah menua tu ba Dewan Suarah ditu kemari.

Sepenyampau RM2,215 juta diungkup ngagai 443 iku penerima di serata nengeri tu, pia ku Nanta seraya madahka nya sebagi ari RM10 juta ti diungkup ngagai 2000 iku penerima di serata Malaysia.

Penerima semina ulih nerima dividen ari penyampau RM5,000 ti diperanakka dalam akaun ASB nya, ku Nanta seraya madah taja pan perintah ngengkahka penyampau RM5,000 ari baruh nama sida.

“ Bala penyereta tu semina ulih nerima dividen ninting taun ke dikredit terus ngagai akaun ASB sida enti sema ASNB udah madahka penyampau dividen nya,” ku iya.

Kelimpah ari nya, Nanta mega ngelalau sida beranakka dividen nya baru ngambika tau nyadi duit galau sida.

Menteri Muda Pemansang Industri (Beranakka Puku sereta Promosyen), Datuk Julaihi Narawi ke sama bisi bejaku ba pengerami nya madah, 135 iku penerima ari pelilih tengah menua nya nyengkaum orang ke umang ari Mukah, Sarikei, Sibu enggau Bagi Menua Kapit.

Bala penerima nya datai ari ruang bilik ke ngembuan penatai pemisi RM600 ke baruh sereta berejista dalam program e-Kasih ti dikemendarka pengari rayat.

Nengah program nya, penyereta disadang nerima dividen urung RM400 ninting taun, ku iya.

Bela bisi ngulu pengerami nya Menteri Muda ba Opis Kepala Menteri, Datu Len Talif Salleh, MP Julau, Datuk Joseph Salang, Sekreteri Mendam ba Opis Menteri Pemansang Menua Pesisir, Datu Chaiti Bolhassan enggau Residen Sarikei, Dahim Nadot.