Ting gaga ati meda mensia kemaya hari tu meretika pemesai guna nyaga pengerai diri

0

KAPIT: Lebih 300 iku peranak pelilih Kapit mujur ngerijista nama ba kaunter farmasi ke ngatur program meresa pengerai mensia mayuh enggau chara enda bebayar ke diatur Kelab Lions Kapit ditu.

Program ‘Dalam Satu’ ke diatur di ‘Care Pharmacy Kapit’ nya dibantu Kelab Lions Kapit, sereta ngatur sekeda program nyengkaum ‘Care Pharmacy 10th Anniversary Celebration’ sereta ‘Pharmacists Day Celebration’.

Beserimbai enggau atur pengawa nya, program meresa BMI (Body Mass Index), meresa sakit kemi manis sereta meresa sukat pejalai darah mega bisi dipejalaika.

Nitihka penerang ari Ting King Yiing seiku orang ke ngempu ‘Care Pharmacy’, netapka tagit urung 200 iku mensia ulih meri awak sida nyeretai program ke diatur sepemanjai dua hari nya.

Taja pia, pemayuh mensia ke ngulu program nya manggai 300 iku, nya tampak nunjukka mensia kemaya hari tu meretika pemesai guna nyaga pengerai diri.

Semua farmasi ke ngambi bagi ba program nya ditumbuhka sereta udah dirijista kenyau ari taun 2004 sereta disambut taun ti ke-10 penumbuh farmasi nya bulan September 2014 tu tadi.

Farmasi nya berengkah ditumbuhka ba sebengkah rumah kedai semak enggau Kapit Town Square ba taun 2004 suba, tang diatu mindah ngagai sebengkah palan ke besai sereta likun berimbai enggau Gerija Methodist Hock Ing dua taun ke udah.

Sepemanjai dua hari program nya, 100 iku mensia keterubah datai meresa pengerai sida enggau enda bebayar bisi nerima perais ke disediaka farmasi nya.

Raban nembiak mega bisi nyeretai program nya sereta nerima sekeda perais ke disediaka farmasi ke ngatur program nya.

Kelimpah ari nya, semua farmasi ke ngambi bagi dalam program nya mega bisi ngaga promosyen ba sekeda bengkah vitamin enggau produk pengerai ke bukai ke bisi dijual sida.

Promosyen nya dipejalaika dalam timpuh dua bulan berengkah ari pun bulan September nyentuk ujung bulan Oktober tu ila.

Program ke-3 diatur ba program nya, “Pharmacists Day” kena 25 2014. Tu keterubah menua Malaysia ngatur program “Pharmacists Day”.

Enggau program tu, raban farmasi ngarapka peranak pelilih Kapit meretika pemesai guna nyaga pengerai kelimpah ari nemu enggau silik chara nguna ubat ke dipakai sida nengah chara ke betul sereta belajarka sekeda penemu bekaul enggau penyai guna dadah ba pengerai sesiku mensia.

Sepasang melaki bini ke empu farmasi nya Mr. Ting King Yiing enggau May Ling Seok Lee mantaika pengaga ati seduai ngagai rayat di menua Kapit ke udah nulung ngemujurka pejalai program nya kenyau ari 10 taun ke udah.

“Enti nadai sukung ari rayat di menua tu, program tu diadang enda ulih bejalai enggau mujur sereta enda ulih nyendiaka servis enggau manah ngagai raban mensia ke datai sepemanjai program tu diatur,” ku iya.

Rayat di menua tu ulih ngenataika tanya sida enda milih maya bekaul enggau penanggul lebuh begunaka ubat.

“Kami berasai amai lantang ati meda pemayuh mensia ke bisi datai nya nunjukka sida meretika pemesai guna ngembuan penemu pasal chara nguna ubat enggau betul.

“Ngarapka program ke baka tu terus dipejalaika suah agi dikena nulung rayat di menua Kapit sereta belematika pemanah ngembuan pengerai ke menyana,” ku iya.

Sama bisi datai ba program nya, Sii Bang Ee, Moonly Tiang, Anthony Jalin Manggie, Ting Bee Eng, Ling Bee Chong, Jenny Yii, Chu Sing Lung, Evelyn Biju, Dr Sia Tih Kong enggau mayuh agi ke bukai.