Tujuh buah sepital ke ari baruh Opis Menteri Pengerai ngulu ‘Quintiles Prime Site Program’

0

KUCHING: Tujuh buah sepital di baruh Opis Menteri Pengerai deka ngambi bagi dalam ‘Quintiles Prime Site Program’, sebengkah inisiatif dunya ti mekuh pengawa ngenyampatka pemansang perubat baru sereta lebih manah.

Menteri Pengerai Datuk Seri Dr. S. Subramaniam madah, program nya dipejalaika nengah sempekat ti disain entara Quintile Sdn Bhd, Penyelidikan Klinikal Malaysia sereta Opis Menteri Pengerai.

Iya madahka program nya deka dipejalaika nengah ‘Memorandum of Agreement’ (MoA) ti udah disain ke benama ‘Agreement On Clinical Research Services To Facilitate The Conduct Of Industry Sponsored Clinical Trials At The Government’s Hospitals’.

“Dibaruh MoA, bisi tujuh buah sepital Opis Menteri Pengerai deka masuk Quintiles Prime Site Program, tu inisiatif dunya ti mekuh ngagai pengawa ngeyampatka pemansang perubat baru sereta lebih manah, ti dipejalaika nengah pengawa kunsi institut perubat ti tebilang.

“Pengawa kunsi tu deka ngemuntangka pengerijista ngagai orang ti deka endur ngujika uji klinikal nya lalu deka dipejalaika ngena uji ti bekualiti tinggi.

“Nengah sempekat tu, ketetiga piak ti bekaul nya dipinta nempa kaul enggau kerejasama ti manah entara pemansik enggau pengereja pengawa, meri kelala inovasyen sereta proses ngurus palan ti tegap sereta bekualiti ngambika uji klinikal dipejalaika enggau lebih manah,” ku iya seraya madahka program ditumbuhka dibaruh ‘Entry Point Project 2 of the National Key Economic Area’.

Subramaniam mantaika pekara nya dalam jaku iya ti dibacha Sapit Ketuai Direktor Pengerai (Pansik enggau Sukung Teknikal) Dr. Shahnaz Murad ti ngarika iya bejadika ‘National Conference for Clinical Research’ Ke-8 (NCCR 2014) ti diatur ba sebengkah hotel ditu, kemari.

Tujuh buah sepital nya nyengkaum Sepital Queen Elizabeth II di Kota Kinabalu; Sepital Raja Perempuan Zainab II di Kota Bharu; Sepital Raja Permaisuri Bainun di Ipoh; Sepital Sibu, Sepital Sultanah Bahiyah di Alor Setar, Sepital Tengku Ampuan Rahimah di Klang enggau Sepital Besai Sarawak (HUS).

NCCR 2014 ke diatur 30 September ngagai 2 Oktober berambaika leka jaku ‘Research That Matter’, lalu keterubah iya konvensyen nya diatur di Borneo.

Ba konvensyen tu bisi tujuh iku speaker ke diambi ari tujuh bengkah menua sereta digulu 530 iku deliget.

Bejaku baru iya madah, Quintiles sebengkah pemekal pemadu besai di dunya dalam pemansang enggau servis  biopharmaceutical ti bisi lebih ari 30,000 pengereja pengawa ti bejalaika dagang ba lebih 100 buah menua.

Quintiles mantu ngemansangka semua 100 produk pemadu pemayuh peminta ba taun 2013, ku iya.

“Prime Site Program tu dilangkar ngambika nempa kerejasama entara Quintiles enggau institution pengerai ti tebilang di dunya,” ku iya.

Kelimpah ari nya, Opis Menteri Pengerai ngembuan penyambung Pusat Pansik Klinikal (CRC) ti diketuaika CRC National ti mega sebuah ari enam institiut pemansik dalam institiut pengerai bansa sereta bisi 30 CRC disikap ba sepital ke mega disediaka pakar.

Tuju CRC iya nya nyadi institiut pemansik ti pemadu tebilang di Asia sereta deka ngangkatka pemanah pengerai pesakit, ti diasil nengah etika enggau kualiti pemansik klinikal.

Sama bisi datai ba pengerami nya kemari, Direktor Pusat Pansik Klinikal Nasional (NCRC) Dr. Goh Pik Pin enggau ke bukai.