SANTUBONG: Nengeri Sarawak mayuh peluang pengawa tang napi pengurang pengereja pengawa teknikal tauka enda chukup palan endur ngelatih nembiak dalam bidang nya.
Tuai Pemegai Menua (TYT) Tun Pehin Sri Abdul Taib Mahmud madah, kelai ke manah laban bisi peluang pengawa, tang nadai ulih napi peminta pengereja pengawa teknikal.
“Beratika gaya tu, aku udah ngasuh Perintah Menua ngaga kimpin di menua pesisir ungkup nembiak kitai din nerang ngagai sida iya peluang pengawa teknikal majak mayuh lalu sida patut ngerebut peluang nya.
“Nembiak kitai patut dilatih dalam bidang teknikal, lalu pelaba aku sida iya enda nesal dudi hari ila, laban penguntung sida iya dilatih dalam pengawa teknikal deka meri sida iya pemisi ke jauh besai agi,” ku Taib.
Iya bejaku munyi nya lebuh bejadika ‘Centre of Technical Excellence’ (CTE) di Jalai Sultan Tengah, Rampangi semak ditu, kemari.
Bala nembiak menua tu ku iya, diatu mayuh udah nemu pemerat pengawa latih dalam teknikal kena ngangkatka pengelantang pendiau, batang pengawa ke berat dalam pemansang SCORE kelebih agi dalam pemansang Sarawak.
“Bechuntoka peluang pengawa di Bintulu, pelatih kitai mayuh ngerebut peluang pengawa dia sereta endur bukai ke muka mayuh peluang dalam pengawa teknikal,” ku iya.
Iya madah baruh SCORE aja, peluang pengawa ke dijangka deka dibuka manggai 2030 ila, bisi lebih 300,000 batang pengawa, ke patut diisi nembiak menua tu.
“Tu mandangka pemerat pengereja pengawa ke bisi latih teknikal deka nambah kelebih agi di SCORE.
“Kelimpah ari peluang pemansang pengawa teknikal, pengawa pemansang dalam industri dagang mega deka sama mansang,” ku iya.
“Nya alai, pengereja pengawa teknikal nyadi sebuah makit ke besai, laban ukai semina dalam menua aja tang kompeni ke besai di menua luar pan berebut ngambi sida iya gawa….Nya pemerat latih teknikal,” ku iya.
Dalam sejarah menua tu, pengawa latih teknikal seruran digaga kompeni peribit baka Shell kelia, ke ngelatih orang biasa ke ngujungka orang tu landik ngereja pengawa ke diasuh Shell.
“Tang kemaya hari tu, kitai enda ulih nejuka kompeni peribit aja ngelatih nembiak kitai, kebuah diatu maya iya Perintah Menua ngelatih mayuh agi nembiak kitai dalam pengawa teknikal.
Sama bisi ngulu atur pengawa nya kemari, Kepala Menteri Datuk Patinggi Tan Sri Adenan Satem, Sapit Kepala Menteri Datuk Patinggi Tan Sri Alfred Jabu, Sekretari Besai Perintah Menua Sarawak Tan Sri Datuk Amar Morshidi Ghani, enggau Direktor Yayasan Sarawak Dato Abu Bakar Marzuki.