Pengajar diperansang nambahka penemu ngambi ulih nempa nembiak ke bekualiti

0

ENGKILILI: Bala pengajar diperansang nambahka penemu enggau penglandik sida ngambika ulih nempa mayuh agi nembiak ke bekualiti, ku Kaban Kaunsil Nengeri (ADUN) Engkilili, Dr Johnnical Rayong Ngipa.

“Pekara nya beguna amat ngambika mayuh agi raban profesyenal bulih pemujur ke manah agi. Kitai begunaka pengajar ti ulih nempa bala nembiak ke nyadi reta menua jemah ila.

“Bala nembiak rebak baru deka nyadi modal mensia ke beguna ba sektor pemansang,” pia ku iya lebuh bejadika pengerami begempuru Serakup Apai Indai enggau Pengajar (PIBG) ke diatur ba SK Merebong Lubok Antu apin lama ke udah.

Rayong mega muji pemujur sekula nya ti teulihka pemutus seratus peratus ba peresa dalam timpuh dua taun bejejurut, kenyau ari taun 2012.

Nengah awak nya, iya lalu ngungkupka belanja RM5,000 ngagai PIBG sekula nya ditangkan MP Lubok Antu,Datuk William Nyalau Badak ti ngungkupka belanja RM7,000.

Kelimpah ari nya, Rayong mega ngungkupka belanja RM5,000 ngagai komiti Surau Darul Naim in Engkilili.

Bela bisi ngulu pengerami nya,Sekretari DO Lubok Antu Ignatius Jinnie Bunyau enggau bala ketuai komuniti bukai.