LUBOK ANTU: Ruang bilik ari Rumah Panjai Nanga Sumpa di Batang Ai, Lubok Antu ke dituntung penusah angus, terus nerima bantu pengasih ari peranak menua ditu.
Bedau lama ke udah, Serakup Ketuai Raban Bansa (PKKM) Iban Pelilih Mit Lubok Antu udah nyuaka bantu pemakai ngagai sida ke tasah nya.
Empat buah PKKM Iban Pelilih Mit Lubok Antu ti dibetuaika Pemancha Jaau Jagit seraya dikemataka Pengulu Mering Changgai enggau Pengulu Jaul Lutau udah meri 48 bungkus beras ngagai sida ke dituntung penusah angus nya.
Ku Pemancha Jaau, bantu pemakai nya datai ari PKKM Iban Pelilih Mit Lubok Antu dikena mantu ngurangka pemar pengidup sida nya.
Ku iya, Rumah Panjai Nanga Sumpa retung laban api kena 13 Mei tu tadi.
“Nengah bantu tu, kami arapka 24 buah ruang bilik di rumah panjai nya nyengkaum 14 buah agi ruang bilik dia, bisi berasai lempung mimit nengah bantu tu,” ku iya.
PKKM Iban Pelilih Mit Lubok Antu madah, Jaau udah nesau serakup enggau NGO ditu ngambika mantu sida ke tasah nya.
“Kitai patut bisi penyiru ngagai orang bukai. Nengah chara tu kitai ulih nempa sebuah komuniti Lubok Antu ke sama bela ulih bebantu dudi ila,” ku iya.