TEGAS ULIH MANTU NEMBIAK MENUA PESISIR: Adenan (empat kiba) lebuh nyempulang Tuai Pemegai Menua nyain plak seraya bejadika CTE nya.
Kerejasama ketuai raban bansa, bala apai indai, pengajar enggau nembiak patut chakah nyapai penyulut dalam bidang teknikal
Dikarang Jacqueline David //
SANTUBONG: Semua ketuai raban bansa, apai indai, pengajar enggau nembiak sekula patut bekunsi enggau perintah nyungkak penyulut pelajar teknikal sereta pengawa latih nyentuk ba renggat ti tau dikemegah.
Kepala Menteri Datuk Patinggi Tan Sri Adenan Satem madah, pemansang pengelandik teknikal patut bendar dikemerat nyerunyut Sarawak nyingkang nuju agenda pemansang ngagai SCORE.
Penyampau puku ke ditanam di SCORE bisi RM30 billion kena ngangkatka menua tu nyadi menua industri sereta muka peluang pengawa dalam macham bidang teknikal ti dijangka manggai 300,000 peluang pengawa sebedau taun 2030.
“Dalam jaku pandak, pelajar teknikal sereta pengawa latih dalam pengelandik tau nyadi pugu pilih nembiak Sarawak napi peminta ari SCORE.
“Nengah pemoden sereta sistem teknologi ti dikembuan kitai diatu, pengawa latih teknikal enda patut dipeda nyadi batang pengawa ke enda likun tauka pengawa ke enda besai gaji. Stigma ti baka nya patut diubah” ku Adenan.
Iya madah, bechuntoka pengawa ngaga robot jari ngena ‘remote control’ di Amerika (US) ulih mantu penyelam ngasaika objek di baruh tasik nya lebuh sida iya di darat.
“Enti baka tu, reti nya sebarang pengawa di baruh tasik, ari biologi marin, pengawa nyambung tauka masang paip di baruh tasik ulih digaga. Aku ukai injinir tang teknologi tu mai berita manah ngagai kitai ke ngembuan pengelandik teknikal baka tu,” ku Adenan.
Iya bejaku munyi tu ba atur pengawa bejadika ‘Centre of Technical Excellence’ (CTE) ti dipenyadika Tuai Pemegai Menua Tun Pehin Sri Abdul Taib Mahmud di Jalai Sultan Tengah, Rampangi semak ditu, kemari.
Dalam taun 1973, CTE suba dikelala enggau nama Palan Latih Pemansang Nembiak (PLPB) ti bepalan di Jalai Pending sereta di baruh opis Yayasan Sarawak (YS), nangkan YS iya dijaga mayuh opis bukai tang diatu iya diberi pulai baru ngagai YS.
Taja pia, palan nya mayuh udah nyapai pemujur dalam pemansang pengelandik teknikal, lalu dalam taun 1997, PLPB teulihka gelar ‘Best Nation Award’ di ‘International Skills Championship’ di St Gallen, Switzerland taun nya.
“Kebuah ngubah PLPB ngagai CTE laban Perintah Menua beratika program sereta pengelandik teknikal diatu bisi pemerat ba pemansang industri menua sereta peluang belajar di palan latih teknikal di CTE patut dikerembaika ngagai nembaik menua pesisir,” ku iya.
Lalu baka nya enggau TEGAS (Tabung Ekonomi Gagasan Anak Sarawak) ari pemun iya dibuka dalam taun 2012, Adenan madah gerempung nya mayuh udah ngangkatka pelajar teknikal di menua pesisir.
“Kaban Parlimen (MP) ba semua sitak di menua tu patut meri penerang pasal pelajar teknikal lalu bakani TEGAS ulih mantu nembiak menua pesisir dilatih dalam pelajar teknikal,” ku iya.
Penumbuh sereta pemujur CTE ku Adenan, endur nyikap peluang ungkup raban nembiak sereta pengereja pengawa di Sarawak ngangkatka pengelantang pendiau diri nengah pengawa latih pengelandik teknikal.
“Tapi raban nembiak diatu iya nya pengawa latih pengereja pengawa teknikal diungkup ngagai SCORE.
“Anang kitai tekenyit ninga bala nembiak kitai ke gawa nyadi juruteknik tauka ‘welder’, gaji sida iya jauh besai ari kerani. Nya alai, padah ngagai bala nembiak kitai ke diau di menua pesisir, anang enda ngerebut peluang latih pengelandik sereta ngereja pengawa pengelandik. Semadi bala nembiak kitai ke diau di menua pesisir nadai pengawa, anjung sida iya ngagai CTE tu, ngambika sida iya ulih dilatih,” ku iya.
Kelimpah ari nya, iya madah, kompeni peribit mega dipinta meri kerejasama lebih agi dalam pengawa industri, mantu sereta bekerejasama enggau perintah ngangkatka pelajar teknikal ba bala nembiak menua tu.
“Nya alai, kerejasama nengah Sempekat Pemereti Ati (MoU) entara peribit enggau perintah berat laban kededua nya bela besaup.
Ba atur pengawa besainka MoU entara YS enggau Shell Malaysia, sereta CTE enggau Petronas, Sacofa, Sarawak Energy Berhad, CIDB, Press Metal Bhd enggau Brooke Dockyard.
Sebedau nya, Sekretari Perintah Besai Sarawak Tan Sri Datuk Amar Morshidi Ghani madah, nitihka pansik mayuh amat bida entara pinta enggau bekal pengereja pengawa ke landik entara 2016 enggau 2020, Sarawak dijangka betapi enggau pengurang urung 27,600 injinir mekanikal manggai 2020, Sarawak semina ulih ngeluarka urung 3,150 pengereja pengawa teknik elektrikal enggau eletronik.
“Beratika penyampau tu mandangka palan teknikal di Sarawak enda tau enda bendar agi ngelatih sereta ngeluarka urung 350,000 pengereja pengawa ke landik, mansi urung 50 peratus KPI manggai 2030, ngambika ulih nyapai peneka menua tu nyadi menua ke mansang dalam industri,” ku Morshidi.
Sama bisi ngulu atur pengawa nya kemari, Sapit Kepala Menteri Datuk Patinggi Tan Sri Alfred Jabu, Menteri Pengintu Pengelantang Pendiau, Orang indu enggau Pemansang Ruang Bilik Datuk Fatimah Abdullah, Direktor Yayasan Sarawak Dato Abu Bakar Marzuki enggau sekeda pemesai bukai..