Dikarang Chris Bishop
KUCHING: Sapit Menteri Pemansang Menua Pesisir enggau Kandang Mengeri Datuk Alexander Nanta Linggi tepantup ati ninga Bajet 2015 ke baru udah dibantai Menteri Besai Datuk Seri Mohd Najib Razak kelebih agi ba agih belanja dikena ngemansang infrastruktur menua pesisir di Sarawak enggau Sabah.
Ku iya, penyampau RM4.5 biliun ari bajet 2015 ungkup pengawa ngangkat enggau nyendia infrastruktur menua pesisir di Sarawak enggau Sabah sigi diterima manah taja pan kededua nengeri begunaka agih belanja ti lebih besai ungkup pengawa nya.
“Aku tepantup ati enggau penyampau RM4.5 biliun ungkup program pemansang menua pesisir di Sarawak enggau Sabah. Kededua nengeri seruran diagih penyampau ke lebih kurang sebaka ba ba tiap kali bajet dibantai.
“Enti diperundingka enggau silik, RM4.5 biliun nya sigi enda chukup tang kitai patut nemu dia bajet tu diungkupka ngagai semua lalu nitihka pengulih belanja perintah.
“Program nyendia enggau ngangkatka infrastruktur di kededua nengeri begunaka agih belanja mayuh agi ari nya,’ku iya lebuh dikerandau lemai kemari.
Iya mega muji perintah nengah bajet ke baru udah dibantai ke alai pengawa meri bekal lekterik enggau ai beresi di ngagai kandang menua pesisir Sarawak enggau Sabah seruran dikemerat.
“Pengangkun perintah nengah bajet ti udah ngungkupka RM1.1 biliun ungkup pengawa mekal kuasa lektrik ngagai 15 ribu buah rumah enggau RM394 juta ungkup pengawa mekal ai beresi ngagai 7,500 buah rumah deka manti ngangkatka ikas pengidup rayat,’ku iya.
Najib ba ‘Bajet 2015: Ekonomi Keperluan Rakyat’ di Dewan Rakyat kemari madahka RM4.5 biliun nyengkaum agih belanja RM943 juta ungkup pengawa ngaga jalai alun pemanjai 635 kilometer sereta ngangkatka jalai batang di Sarawak enggau Sabah.
Kelimpah ari nya, belanja RM200 juta diagih ungkup pengawa ngaga sereta ngemanah 9,500 buah rumah di kededua nengeri.
Nambahka nya, Najib netapka RM160 juta diagih ngambika dikena ngangkatka serbis sistem pengangkut langit Sarawak enggau Sabah nengah atur ngintu enggau nyuwa bilun baru.