Enti dokumen disain nya udah nyadi sah lalu semua semaya dalam nya patut dititih magang
KUCHING: Pemeli rumah dilalau enda nyain sengapa sebedau meretika enggau silik tiap dokumen semaya ti diberi pemaju dikena nyeliah diri ari sebarang penanggul jemah ila.
Panel Tribunal Tuntutan Pembeli Rumah Sarawak (TTPRS) Mike Boon Chee Kian madah, pemeli mega patut ngiga orang bukai ke ulih mantu nyema bisi penanggul deka meretika dokumen ke diterima.
“Bepelasarka kes ti nyadi, kami ngelalalu semua pemeli rumah ngambika enda nyain buta sebarang dokumen semaya lalu nyema enda meretika (dokumen) patut ngiga orang bukai mantu tauka meri lalau pasal pekara ti ditulis dalam nya.
“Anang terus pechaya laban enti kita udah nyain, dokumen nya nyadi sah sereta enda ulih disangkal tauka dikeenggaika,” ku iya.
Iya madahka pekara nya dalam aum pengarang berita pengudah mending sereta mutarka ‘Kes Kecacatan Mutu Kerja (Defect) dan Lambat Serah Milikan Kosong’ (LAD) ti diatur ba Kot TTPRS, Tingkat Tiga Kunsil Negeri (DUN) lama kemari.
Mike mega ngingatka pemeli ngambika betemu enggau pemaju nyema deka ngaga ripot pasal pengelemi tauka penimpang kualiti kereja ba rumah ti dibeli.
“Tentuka kita betemu enggau pemaju ngambika penanggul ulih dipasuk dalam dokumen (enda ngira baka ni, asalka bisi bukti nyengkaum gambar).
“Kami (kot) enda ulih mutarka tauka ngaga pemutus nyema semina ngena semaya mulut tauka jaku aja,” ku iya seraya madahka pemaju mega patut ngemeranka pekara ti sama lebuh ngatur pekara enggau pemeli.
Berebak enggau tu iya madahka komunikasi entara pemeli enggau pemaju amat beguna dikena nyeliahka sebarang penanggul ke tau nyadi.
“Kerejasama kededua piak amat beguna lalu ari kes ke nyadi seharitu (kemari) ulih diputar ngena chara manah pengudah kededua piak duduk berandau,” ku iya.
Kelimpah ari nya, Chairman Panel TTPRS Peter Lim Thiam Seng madah, kes entara pemeli enggau pemaju nya kemari beduduk ari sama setuju sereta lalu ari tribunal, mujur diputarka di luar kot.
Dulu ari nya pemeli minta bayar sepenyampau RM5,525.80 ngagai Defect dan LAD ke sebuah rumah ungkus murah di Kota Samarahan.
Taja pia penyampau ganti rugi ke bendar ti sama dipesetuju kededua piak enda dipadahka tribunal.
Sama bisi maya berandauka kes nya kaban panel Morni Wahie.