Dikarang Rengenyan Labang
KUCHING: Bisi 500 iti tampang kayu bakau mujur ditanam di Kuching Wetlands nengah Program Eco Bako kemari.
Program nya dipasuk lebih 150 iku nembiak Pom Tiga Sekolah Menengah Sains Kuching Utara (SAKURA) sereta ejensi tauka opis bukai.
Program nya diatur Opis Rampa Menua (JAS) Sarawak nyerumba pengerami Minggu Rampa Menua Malaysia (MASM) Renggat Negeri Sarawak 2014.
Program nya diatur JAS enggau kerejasama Opis Kampung Sarawak enggau Petronas Carigali Sdn. Bhd. Sarawak Operation sereta piak sekula enggau ejensi.
Tuju program diatur dikena meri penyedar ngagai mensia mayuh pasal pemesai reti nyaga rampa menua, nyerumba MASM ke diatur tiap taun kena 21 ngagai 27 Oktober tu.
Rambai jaku MASM 2014 iya nya ‘Ya! Teruskan Gaya Hidup Lestari’ ti minta genap raban bansa ngemerankan pengidup lestari dalam semua aspek pengidup tiap hari.
Entara objektif MASM iya nya ngangkatka penyedar rampa menua ba raban bansa kelimpah ari ngerapitka kaul entara ejensi tauka opis perintah besai enggau negeri ba pengawa nyaga enggau ngibun rampa menua.
Nyerumba program tu kemari, lebih 150 penyereta dibai eksesais seraya belagu sebedau nanam kayu bakau nya ti diketuaika Pengurus Tapak Ramsar Sulaiman Jamahari.
Entara atur ti dipejalaika nyerumba program tu kemari iya nya simbolik bejadika papan pal Program Eco Bako enggau nyuaka setipikit ngagai piak ti enggau ngemujurka program nya.
Sama datai ngagai pengerami nya, Direktor JAS Sarawak Ruslan Mohamad, Senior Manager HSE Department, Petronas Carigali Sdn. Bhd. Sarawak Operationm Suhaimi Ahmad, enggau ke bukai.