BELURU: Enti kami ukai pengari Barisan Nasional (BN) tauka Parti TERAS tu sebengkah ari parti penyakal, nama kebuah kami agi mengkang duduk di baruh perintah Barisan Nasional sereta agi bejalaika pengawa kami nyadi pengari rayat di sitak Kunsil Nengeri enggau Parlimen?
Penemu nya dipansutka Sekretari Parti TERAS General Datuk Sylvester Entri Anak Muran ke nyangkal penemu sekeda mensia ke ngumbai parti nya ukai parti dibaruh Barisan Nasional.
Raban parti TERAS ke diketuai Tan Sri William Mawan Anak Ikom bisi bejalaika kimpin begulai enggau rayat di Marudi kena Hari Enam tu tadi.
Penemuai nya digulu kaban parti ke bukai nyengkaum Mandal Presiden Parti TERAS Datuk Peter Nansian Ngusie, Pengari Kanan Presiden Rosey Yunus enggau Tukang Wang Parti Paulus Palu Gumbang.
Semua sida tu di baruh parti SPDP ke menang ba pengawa bepilih besai ngena tiket Barisan Nasional sebedau tu lalu udah ningkilka diri ari parti nya lalu masuk TERAS.
Semua pengari rayat ke nyeretai parti TERAS tu mengkang megai tanggungpengawa sida nyadi Kaban Kaunsil Nengeri (ADUN) sereta mengkang nyadi Kaban Parlimen (MP) ba sitak ke dipegai sida. Semina Paulus ke ADUN Batu Danau ke megai tanggungpengawa nyadi Chairman MPA enggau SESCO Board Member.
Sukung ke diberi rayat di pelilih menua Marudi chukup tegap sereta nunjukka rayat di menua nya mengkang nyukung pengari rayat ke ngarika pelilih menua nya di baruh parti Barisan Nasional.
Nitihka penerang ari iya, lebih 4,000 iku rayat ke nyeretai parti SPDP sebedau tu madahka diri besedia deka nyeretai parti TERAS.
Entri meri besai terima kasih tanda pengaga ati iya nerima sukung rayat di Marudi ke chukup tegap sereta seruran nyukung perintah Barisan Nasional.
Kelimpah ari nya, Entri madahka diri udah ngatur mayuh perambu pemansang ungkup ngagai rayat di pelilih menua nya nengah parti baru ke dipasuk iya.
Kelimpah ari nya, pengari rayat ke bukai nyengkaum Rosey enggau Paulus mantaika pengaga ati diri berindik ari sukung ke diberi rayat di pelilih menua nya.
Tuai Raban Indu Parti TERAS Kaunsiolr Eda Igar ngarapka kelelima pengari rayat ke ngarika lima bengkah sitak ADUN nya ulih ngetanka penuduk diri empu maya pengawa bepilih besai nengeri ke deka datai.
Entri mega diberi sukung ke chukup meransangka ati ari rayat di Marudi sereta diadang ulih ngetanka penuduk iya nyadi pengari rayat ungkup sitak Marudi ba pengawa bepilih besai nengeri Sarawak ti deka datai.