KUCHING: Opis Menteri Pengintu Pengelantang Pendiau, Orang Indu enggau Pemansang Ruang Bilik (KKWPK) nengah ‘Majlis Wanita Kebangsaan Sarawak’ (MWKS) enggau Biro Wanita dalam ejensi tu merambu ngaga empat buah bup enda lama agi, ngelalau mensia mayuh ke bisi kaban belayan, diri sebilik (indu aja) ke bisi enggau pengawa politik, tau meri penerang ngagai ejensi tu ngambika ulih disengkaum dalam bup ti deka dichelak ‘Sarawak Women in Politics: The Pioneers’.
Menteri KKWPK Datuk Fatimah Abdullah madah, bup ‘Sarawak Women in Politics: The Pioneers’ tu sebuah bup ‘Coffee Table’ deka nusoi pengawa orang indu ke nyadi pemungkal dalam politik sebedau merdeka menya.
“Tu nyengkaum personaliti ke mayuh enda dikelala rebak diatu. Nengah pansik ti bisi disedia, kami ngarapka tiap bengkah pengawa ke udah dipejalaika orang indu menya dalam pemansang ulih dirikod,” ku Fatimah.
Iya madah munyi nya lebuh bejaku ba aum media bekaul enggau pengawa nyelak sekeda bup beserimbai enggau Hari Orang Indu 2015, di opis iya di Bangunan Baitulmakmur di Petra Jaya ditu, ensana.
Sama bisi nguluka aum nya, sekeda penulis bup sereta MWKS.
Iya madah, barang sapa ke bisi penerang lebih agi pasal orang indu ke kala gawa ke menua tu sebedau merdeka menya, minta kaban belayan sida nusoi ngagai Sekretari Mendam KKWPK Rodziah Morshidi tauka nuju Direktor Biro Wanita, Noriah Ahmad.
“Kami ukai semina ngemeratka sebengkah bansa aja, tang semua indu Sarawak ari genap pupu bansa, nya alai, barang sapa ke bisi penerang pasal sida tu, tau betelefon ngagai kami, ngambika ulih disengkaum ba pengawa nya.
“Mayuh ari sida tu udah nadai, tang kaban belayan sida iya agi bisi, nya alai, kami beguna bendar ke penerang ngambika ulih disengkaum sereta dirikod dalam bup tu,” ku iya.
Entara nama orang indu kelia ke ditemu endang mayuh mantu indu bukai sebedau merdeka, iya nya baka niang Barbara Bay, Lily A, Mak Sitom, Datuk Tra Zehnder, Bibi Macphersonn, Hjh Sharifah Rohana, Hjh Dyg Sabariah Awang, Mdm Chee, Raden Dyg Rubiah sereta bisi agi ke bukai.
“Bisi sekeda kami endang nadai rikod, tang ngarapka mensia mayuh sereta kaban belayan sida ulih mantu kami, kelebih agi indu kelia ke mayuh udah mantu sebedau merdeka, indu Iban, China enggau Bidayuh,” ku Fatimah seraya ngarapka bup tu ulih tembu bulan September 2015.
Iya madah, ukai semina nusoi pasal indu nya aja tang minta kaban belayan sida nusoi gaya lebuh nya, bakani indu maya nya dikemerat sebedau merdeka sekalika sida bisi pelajar tauka masuk politik.
Tiga buah bup bukai ke sama deka dichelak, iya nya bup ‘Sarawak Women in Volunteerism’ (diperambu tembu Disember 2015) alai pengawa orang indu ke ditemu mayuh udah mantu dalam pengawa ngatika diri.
Nangkan nya, bup ‘Sarawak Women in Decision Making’, sebuah bup akademik ti deka mantu orang indu ba pekara ngaga pemutus, ngambika ulih nyadi teladan ba indu kemaya hari tu, lalu dikearap bup tu tembu dalam Februari 2016.
“Kitai beratika penuduk kitai diatu kelebih agi rebak baru, ari sukut kitai ke diatu, dini endur tikas nya, nama pengurang iya, tauka pengurang sistem sukung diatu sereta kebuah bukai.
“Laban diatu, jeman kitai, bala orang indu mayuh udah mansang dalam pengawa ngaga pemutus,” ku iya.
Nangkan nya, taun baru tu ila, ba pekara Orang Indu dalam pengawa Seni ‘Sarawak Women in Arts’, ti deka dipunka beserimbai enggau Hari Orang Indu taun 2015 ke deka berambaika leka jaku ‘Orang Indu Sarawak dalam Dunya Seni’.
Iya deka mandangka pemansang pengawa ti udah digaga orang indu dalam pekara seni, visual, tauka dalam pengawa seni kraf jari, lalu bup tu dikearap ulih tembu ba bulan September 2015.
“Orang indu Sarawak endang tebilang ba pengawa seni, endang ditemu kitai mayuh pengelandik baik nya ba pengawa pemerindang, ajat, bangsawan, pelukis, kraf jari ngaga marek, songket sereta pengelandik bukai,” ku iya.
Semua bup tu ila, enti udah tembu deka dijual di MWKS tauka Biro Wanita, lalu enggau rega RM80 sebuah tauka RM120 (hard copy).
Naka ke diatu, pemayuh bup ke udah dichelak nengah ejensi nya, ‘Sarawak Women Past Indepedant Years’ (sebuah bup akademik), ‘Sarawak Women in Politics’ (Coffee Table), ‘Sarawak Women in Business’, enggau ‘Sarawak Women in Volunteerism’.
Sama bisi ngulu aum media nya kemari, ketuai ngaga bup ‘Women in Vounteerism’ Datin Dr Napsiah Mahfoz, Rodziah, enggau Noriah.