KUCHING: Program Eco Bako dikearapka ulih nambahka penyedar ngagai mensia mayuh lebih agi nembiak pasal pemesai reti enggau guna nanam baru bakau dikena nyaga rampa menua.
Direktor Opis Rampa Menua (JAS) Ruslan Mohamah madah, nengah pengawa nanam baru bakau nya ba kandang ke kusi, ulih nyeliahka kandang endur nya ari sebarang penanggul tauka penasah besai.
Berindik ari nya iya madah, JAS nyadika pengawa nanam baru bakau nya sebengkah aktiviti nyerumba Minggu Rampa Menua Malaysia (MASM) ti diintu tiap taun.
“Program Eco Bako seharitu iya nya program nanam baru bakau ti diatur nyerumba pengerami Minggu Rampa Menua (MASM) renggat Negeri Sarawak 2014.
“Tuju program seharitu, kitai deka meri penyedar ngagai nembiak sekula pasal pemesai guna enggau reti nyaga rampa menua nengah pengawa nanam baru bakau di menua kitai baka ba Kuching Wetlands. Kelimpah ari nembiak, kami ngarapka program ti baka tu mega meri penyedar ngagai genap raban bansa.
“Tuju kitai beratka pengawa nanam baru bakau tu laban bakau tu ulih nyeliah tauka ngelindung kitai lebuh maya penanggul tauka penyadi tasah besai baka tsunami,” ku iya.
Ruslan mansutka pekara nya lebuh dikerandau pengarang berita, pengudah nguluka lebih 150 iku nembiak Pom Tiga Sekolah Menengah Sains Kuching Utara (SAKURA) nanam baru bakau nengah Program Eco Bako ti diatur ba Kuching Wetlands ditu, kemari.
Program nya diatur JAS Sarawak enggau kerejasama Opis Kampung Sarawak enggau Petronas Carigali Sdn Bhd Sarawak Operation sereta beberapa ejensi bukai.
“Seharitu begulai enggau nembiak sekula tu (SAKURA) kami udah mujur nanam 500 iti paung bakau ba pemesai kandang endur setengah hektar.
Nambahka nya, Pengurus Tapak RAMSAR (Hutan Tanah Bencah) Sulaiman Jamahari mega madah, penyedar orang mayuh bekaul enggau nanam baru bakau amat beguna dikena nyaga rampa menua.
Nitihku Sulaiman, penyampau RAMSAR di Malaysia semina enam buah aja nyengkaum Kuching Wetlands ti nyadi RAMSAR ti kelima lalu di Kinabatang Sabah RAMSAR ti keenam kelimpah ari tiga di Johor enggau sebuah RAMSAR di Pahang.
RAMSAR di Sarawak iya nya Kuching Wetlands bisi 6,610 hektar pemesai, ari penyampau nya 50 hektar diungkupka ngagai program penyedar ke raban bansa pasal pemesai guna nyaga rampa menua nengah pengawa nanam baru kayu bakau, ku iya.
“Di Sarawak, 50 hektar diungkupka ke tuju program Plot Kesedaran Awam enggau juluk dikena meri penyedar ngagai orang mayuh enda ngira renggat umur sekalika ba sekula, maktab, Institut pelajar tinggi tauka raban gerempung ukai dikuasa perintah, pasal pemesai guna nyaga rampa menua.
“Naka ke diatu semina 40 hektar (ari 50 hektar) udah ditanam baru kayu bakau. Dalam bulan Oktober tu aja naka ke sehari tu bisi empat program udah diatur ke mujur nanam 3,500 pun kayu bakau,” ku iya seraya madah, di serata dunya lebih ari 1,800 kandang endur udah digazet nyadi RAMSAR.
Kelimpah ari nya Ruslan ngenang pasal MASM, iya madahka MASM diatur 21 ngagai 27 Oktober tiap taun kenyau ari taun 1989.
Lalu taun tu renggat menua, MASM deka diatur sereta dipenyadi di Kedah kena 1 November lalu renggat negeri Sarawak deka dipenyadi kena 23 Oktober tu.