Ejensi, NGO bukai dipinta besaup enggau KRT

0

Semua kaban komiti nya dikearap mantu ngenegapka pengelikun ba sesebengkah genturung pendiau

Dikarang Edwin Jemat //

SERIAN: Sapit speaker kaunsil nengeri Datuk Roland Sagah Wee Inn ngelalau semua ejensi lebih agi RELA, Komiti Pemansang enggau Pengelikun Genturung Pendiau (JKKK) sereta ke ukai dikuasa perintah (NGO) bukai ba sesebengkah genturung pendiau besaup enggau Komiti Rukun Tetangga (KRT) ngenukuka pengelikun seruran dikemerat.

Ku iya, dulu menya ba dedini genturung pendiau tauka rumah panjai, mensia mereti magang lalu nadai sekali pan kitai ninga orang sebanaka keresa, jelu tupi tauka utai tanam sida dikeruga tang enti bisi pan jarang amat.

“Dunya diatu udah jauh berubah sereta mansang lalu ari nya pengawa nginau ti dipejalaika SRS (Skim Nginau Ngatika Diri) di baruh KRT tu endang engkeman bendar kena nyaup ngelikunka sesebengkah gunturung pendiau,” ku iya seraya meransang ejensi ti bekaul bekempit enggau raban pengelikun bukai baka polis.

Iya ke mega penyanding penemu KRT Kampung Rayang bejaku munyi tu ba sebengkah atur pengawa ke endur iya bejadika ‘Program Jom Ronda’ ti diatur Opis Penyerakup Bansa enggau Integrasi Nasional (JPNIN) di balai rama Kampung Rayang ditu malam Hari Enam tu tadi.

Berebak enggau nya iya muji penyakah KRT Kampung Rayang ketegal mujur ngatur pengawa nya seraya meransang mayuh agi raban nembiak masuk SRS dikena nyaup nempa peranak menua ti mereti sereta angkun ke pengelikun enggau pengelantang genturung pendiau.

“Raban nembiak tu mih patut dikemerat, enti sida tu kelalu mayuh awak belepa, runding sida mega tau tekuing ngereja ulah ti enda menuku, tang lebuh bisi orang tuai ngiring dia ulah sida dikearap nemu berubah.

Ngenang pemanah kaul enggau pemereti penemu orang dulu suba, Sagah ke mega kaban kaunsil nengeri (ADUN) sitak Tarat bebanding, tiga empat puluh taun ke udah kitai nadai mayuh penanggul pengelikun tauka ulah jai baka diatu.

“Diatu, sikap individualistik udah balat dikemeranka kitai mensia lebih agi ba genturung pendiau di kandang mengeri lalu tu ngujungka sekeda orang ke berimbai pendiau enda ngelala pangan diri,” ku iya seraya meransang KRT chakah agi bejalaika pengawa dikena ngedut kaul, nyungkak pemereti penemu enggau pangan diri.

Kelimpah ari nya, iya ngelalau semua peranak menua nyeliahka penemu sereta achuk ti tau ngeruga pengelikun sereta ngerusak kaul entara raban bansa.

“Anang kiruh ke sida ti semina ngulihka penguntung diri, mayuh udah didinga, sekeda orang sengapa bepetenahka cherita sereta ngapika sesebengkah isu ke sensitif lebih agi nengah media sosial ngambika orang bukai ringat,” tandu iya.

Bela bisi ngulu atur pengawa nya, pemesai JPNIN Samarahan Suzana Busalam, Ketuai Opis Penyasat Pengawa Salah Serian ASP Mohammad Fauzi Yusuf, kaban KRT ari tigabelas genturung pendiau di Serian sereta lima ari Kota Samarahan enggau kaban SRS ari baruh KRT nya.