DIPENYADI: Halimah mangkung gong kelai bejadika program ‘Minggu Alam Sekitar Malaysia’ (MASM) Sarawak seraya dikemata (ari kiba) Peter, Ruslan enggau Kadim.
Menua Malaysia, Indonesia bisi ngatur aum kena bejuraika atur ti engkeman mutar penanggul nya
Dikarang Chris Bishop //
KUCHING: Perintah Malaysia enggau Indonesia benung nusun sebengkah Sempekat Pemereti Ati (MoU) ngambika penusah pengamah sebun angin ba kededua menua tu ulih diputarka enggau engkeman.
Ketuai Direktor Opis Rampa Menua Malaysia Dato Halimah Hassan madah ketuai ari kededua menua bisi ngatur aum bejuraika penusah pengamah sebun angin ke alai pengawa nunu ti dikereja enggau enda beradat endang ditagang.
“Perintah Malaysia endang seruran minta perintah Indonesia bejalaika atur nagang pengawa nunu enggau beradat dikereja.
“Pengamah sebun asap asil ari pengawa nunu nya ditabanka angin meraka garis entara menua lalu ngujungka gaya hari kitai ditu balat besebun.
“Kitai bisi aum renggat bilateral lalu merambu sebengkah MoU ngambika pengawa nunu ke enda beradat tu ulih ditagang,” ku iya.
Iya mansutka jaku tu lebuh dikerandau pemberita pengudah bejadi Minggu Alam Sekitar Malaysia (MASM) Renggat Nengeri Sarawak enggau Seminar Peraturan-Peraturan Kualiti Alam Sekeliling (Udara Bersih) 2014 di seiti hotel ditu, kemari.
Halimah nambah, kerejasama entara Malaysia enggau Indonesia seruran diadu manah ngambika api ti nganguska kampung ulih dipadam enggau lengkas kelimpah ti bejalaika pengawa matau pengawa nunu.
Ku iya, diatu pendiau hari di Sarawak, Sabah enggau Kalimantan balat kering lalu mayuh tumpuk angat ditemu kelebih agi ba Kalimantan.
“Penusah sebun meraka adan tu begunaka kerejasama bilateral entara kededua menua ke alai kitai mega bisi ngadu sempekat enggau menua Thailand, Brunei, Singapura sereta Indonesia,’ku iya.
Ngenang sebun angin ke nyadi asil ari pengawa nunu dalam menua tu empu, Halimah madah ukum nitihka adat deka diletak ngagai orang ke ngereja penyalah.
“Kitai begulai enggau Opis Rampa Menua (JAS ) sereta NREB deka mantau pengawa tu kelebih agi ba musin kemarau,’ku iya.
Lebih 400 iku orang datai ngulu Minggu Alam Sekitar Malaysia (MASM) Renggat Nengeri Sarawak enggau Seminar Peraturan-Peraturan Kualiti Alam Sekeliling (Udara Bersih) 2014 kemari.
Ba pengerami nya, JAS bisi nyain MoU enggau Universiti Malaysia Sarawak (UNIMAS) ba atur bejalaika Program Rakan Alam Sekitar.
Bela datai Mandal Canselor UNIMAS Prof Dato Dr Mohamad kadim Suaidi, Direktor JAS (Sarawak) Ruslan Mohamad enggau Controller Opis NREB Peter Sawal.