Pengerami ‘Fund Raising Dinner’ Gerija St. Alban diatur malam tu

0

SARIKEI: Gerija St. Alban Sarikei deka ngatur ‘Fund Raising Dinner’ kena 24 Oktober tu.

Program nya dipejalaika ba Dewan Suarah Sarikei, berengkah pukul 6.30 lemai.

Jurujaku pengatur pengerami nya madah, atur pengawa ninting taun raban gerija St. Alban diatur dikena ngumpul belanja ngambika bisi bejalaika pengawa gerija nya dudi ila.

“Program nya mega diatur beserimbai enggau penemuai Right Reverend Aeries Sumping Jingan.

Kelimpah ari nya mega dikena ngelaika pengaga ati nerima 133 iku kaban baru kitai,” pia ku iya lebuh dikerandau media, ensana.

Ba pengerami nya, raban pengatur pengerami bisi nyendiaka 60 buah mija ke berega RM400 sebuah.

“Kami ngelaluka sesapa ti bisi ati ngulu pengerami nya ila.

“Enti sema deka minta galauka mija tauka deka nemu silik sentang atur pengawa nya, kita tau bejaku enggau Rev. Fr. Rentap Nuang nengah lumur 016 8091341,” ku iya.

Temuai ti dipebasa ke dipelaba datai ngulu pengerami nya ila iya nya Menteri Pemansang Rama sarawak, Tan Sri William Mawan Ikom.