Taja KPSAS ngembuan tanggungpengawa berat sereta majak mayuh tang agi relevan

0

Dikarang Jacqueline David //

PADAWAN: Opis Menteri Pengatur Pemansang Pengeraja Asal enggau Rampa Menua II (KPSAS) taja majak berat tang  tanggungpengawa opis nya agi relevan.

Menteri nya, Datuk Amar Awang Tengah Ali Hassan madah penambah portfolio begunaka opis menteri nya beratika baru perambu ke strategik setipak enggau portfoli ke udah nambah.

“Kami benung nyendiaka Perambu Strategik ungkup taun 2015-2020, setipak enggau ubah dunya, nitihka singkang sereta kuing.

“Ari 2011, mayuh portfolio sereta opis menteri dipasuk ngagai opis menteri kami nyengkaum pekara bekaul enggau Rampa Menua. Nya alai, berat endar ngaga perambu objektif, misi enggau visi opis menteri tu nyadi strategik, tetipakka rambai jaku ‘Spearheading Sustainable Natural fresources and Urban Environment’,” ku Awang Tengah.

Iya madah munyi nya lebuh dirandau pengudah Nutup ‘Bengkel Perancangan Strategik KPSAS’ di Borneo Highlands Resort di Puncak Borneo, semak ditu, kemari.

Dulu ari nya, Sekretari Mendam KPSAS Datu Sudarsono Osman madah tujuh bengkah Objektif digaga nengah Perambu Strategik tu, iya nya ngena enggau naka ulih sereta nyaga pngaya kampung ngena atur ‘Land Use Policy’,

Ba atur pengawa nya kemari, urung 100 raban KPSAS dibai bemalam ba endur nya bejuraika Perambu Strategik ungkup opis menteri nya, lalu maya nutup atur pengawa nya kemari, Awang Tengah ngungkupka geran RM20,000 sereta Menteri Muda di opis menteri nya, Datuk Naroden Majais nyuaka geran ungkup RM10,000 ngagai kelab pengereja pengawa opis menteri nya ke udah ngatur bengkel nya.

Sama bisi nguluka atur pengawa nya kemari, Pegawai Tadbir Khas/Penyanding Penemu Pengelikun KPSAS Datu Wan Alwi Dato Sri Wan Hashim, enggau Penyanding Penemu Opis Kaunsil Perambu Menua, Datu Abang Kassim Zawawi.