KUCHING: Tuai Pemegai Menua (TYT) Tun Pehin Sri Abdul Taib Mahmud deka ke tiap bansa di negeri tu neladan pemujur pangan diri ngambika tetipakka pemansang Sarawak.
Ku iya, pemujur tauka penyulut ulih diasaika semua bansa laban sama bela bisi peluang mujur di menua tu.
“Sebengkah pekara ti patut dikeingatka kitai seharitu iya nya semua orang bisi peluang ti sama ba pengawa ngulihka pemujur.
“Ulih dipeda kitai pengudah 50 taun merdeka, mayuh rayat kitai ti enda ngira bansa sekalika China, Melayu, Iban, Bidayuh tauka Orang Ulu udah teulih sereta nunjukka pemujur diri.
“Tu ngayanka pemendar kitai udah mujur lalu kitai patut deka ngetanka pemujur nya nengah chara nyeliahka ulah ti enggai meda pemujur orang, tang ke patut terus beserakup sereta mantu pangan kitai ke bukai ngambika sama teulihka pemujur,” ku iya.
Iya mansutka pekara nya lebuh bejaku ba ‘Majlis Malam Gemilang Putra Sentosa 2014’ di Hotel Four Points ditu, malam ensanus.
Bejaku baru Taib madahka diri lama udah nganti deka meda pemujur anak Sarawak lebih agi dalam bidang dagang lalu udah tejapai pengudah 50 taun Sarawak merdeka.
“Malam tu (ensanus) kitai ulih meda pemujur anak Sarawak dalam pengawa dagang lalu ti patut dikemegahka iya nyadi ba bansa Bidayuh.
“Enti suba bansa Bidayuh dikumbai lembut, mimit tubuh sereta tinggal tang diatu udah berubah lalu tu meh bukti iya,” ku iya.
Kelimpah ari nya, Menteri Pemansang Infrastruktur enggau Penyambung Dato Seri Michael Manyin Jawong lebuh bejaku minta komiti Bidayuh ngemeranka ulah positif ngambika teulihka pemujur.
Nitihku iya, pemujur orang ti ngempu Putra Sentosa Enterprise, Henry Harry Jinep patut dijadika chunto ngagai anak Bidayuh ke bukai.
“Enti Henry ulih mujur, nama kitai enda? Nya alai, bebendar meh tang ke pemadu beguna anang ngembuan ulah kepapas tang nyadika pemujur orang bukai ke peransang diri,” ku iya.
Pengerami nya diatur dikena ngerami pemujur Putra Sentosa Enterprise ti udah mujur nempa nama dalam pengawa dagang sereta nerima Anugerah Konteriktor Terbaik Gred G6 2012 & 2013.
Sama datai ba pengerami nya bini TYT, Toh Puan Ragad Kurdi Taib, Menteri Muda Pengerai Mensia Mayuh Datuk Dr. Jerip Susil sereta Sapit Speaker Kunsil Negeri Datuk Roland Sagah Wee Inn.