BAU: Semua ketuai genturung pendiau, ketuai raban bansa, komiti pemansang enggau pengelikun genturung pendiau (JKKK)sereta gerempung ti udah nerima ungkup geran Projek Mit Pemansang Menua Pesisir (MRP) dilalau nganjung riput wang ngagai Opis Pelilih Mit Menua.
Menteri Muda Pemansang Industri Datuk Peter Nansian madahka, tuju iya ngambika Opis Pelilih Mit Menua ulih matau sereta nemu baka ni duit nya diguna.
“Aku minta tulong sida ke udah nerima geran nya (MRP) (ba sitak Tasik Biru) ngaga riput baka ni duit nya dipelanja lalu (riput) dianjung ngagai Tuan D.O.
“Semua patut meri riput wang nya ngagai DO laban aku empu pan deka nganjung riput ngagai perintah, ngambika perintah nemu semua ungkup belanja ti diberi nya udah dikena enggau chara ti manah,” ku iya.
Nansian mansutka pekara tu lebuh bejaku ba pengerami nyuaka geran MRP ti diatur di Dewan Suarah Bau ditu, kemari.
Dalam taun 2014, iya ti nyadi kaban kunsil negeri (ADUN) Tasik Biru udah nyuaka geran MRP urung RM3 juta ngagai ketuai genturung pendiau, gerempung sereta JKKK enggau ke bukai ti dipegai sitak iya.
Ba pengerami nyuaka geran MRP ti kedua kali taun tu, Nansian udah nyuaka geran RM584,940 ngagai 28 iku penerima nyengkaum ketuai genturung pendiau, gerempung enggau JKKK sereta ke bukai.
“Aku ngarapka MRP tu dikena enggau manah. Penyampau ke diberi nitihka peminta kita lalu bisi ke enda minta nya aku terus meri ngambika bisi dikena bejalaika pengawa kita,” ku iya.
Kelimpah ari nya, DO Bau Enting Nyami minta rayat di pelilih menua nya nyukung perintah ngemansangka pelilih mit menua nya.
Ku iya, rayat menua nya patut ngenataika terus ngagai Opis Pelilih Mit Bau nyema bisi penanggul tauka peminta ti deka dikenataika.
“Enti deka ngangkatka pemanah ti bekaul enggau pemansang sereta penanggul ba genturung pendiau, ketuai raban bansa tauka genturung pendiau patut datai ngagai opis kami ngambika kami ulih mai pekara nya ngagai orang ti patut,” ku iya seraya madahka Opis Pelilih Mit nya deka matau geran MRP ti diberi ngagai penerima.