Buai runding kepapas dalam SDNU: Tengku

0

Kitai deka meda semua kaban beserakup sereta ngembuan kaul kerejasama ke terit

SIBU: Runding ti kepapas ulih mambarka sesebengkah gerempung sereta tau ngujungka juluk tauka batang pekara ke udah dikereja gerempung nyadi puntan.

Chairman Serakup Bansa Dayak Sarawak (SDNU) Pampang Sibu Tengku Gruna madah, gerempung patut dipejalai awakka meri penguntung ngagai semua sereta ngagai gerempung nya empu lalu ukai nyadi palan endur ngutuk pangan diri tauka alai nyimpan runding kepapas.

“Nyema bisi buah penemu ke manah, uji perundingka begulai. Awakka semua ke nyadi kaban gerempung tau bulih penguntung asil ari buah penemu nya. Nyema bisi ngembuan dendam tauka rundingka kepapas tau ningkilka diri ari gerempung.

“Baka nya mega dalam SDNU tu kelebih agi ba pampang Sibu ditu. Kitai deka meda semua kaban beserakup sereta ngembuan kaul kerejasama ke terit. Buai sereta iarka runding kepapas dalam SDNU,” ku iya.

Tengku mansutka jaku nya rambau nyuaka kad kaban SDNU Pampang Sibu ngagai SDNU Unit Sentosa II ditu, empai lama ke udah.

Sama bisi datai iya nya Ketuai SDNU Unit Sentosa II Manggi Gamang.

Urung 50 iku ba unit nya diatu udah nganjung peminta nyadi kaban SDNU Pampang Sibu.

Tengku ti mega nyadi Sekretari Politik Kepala Menteri madah, sesebengkah gerempung ke ditumbuh ulih nyadika pelasar alai ngenataika sebana ungkup sesebengkah raban awakka meri penguntung ngagai komuniti nya empu.

“Baka SDNU tu, iya ditumbuh dikena ngarika kitai Dayak lebih agi kitai ke diau di mengeri.

“Nengah SDNU tu, iya ulih nyadika pelasar alai kitai ngulihla penemu, nyadi penyungkak penatai pemisi enggau pengerembai ekonomi kitai lalu udah nya dikena ngedut pemanah kaul enggau mayuh agi ke bukai,” ku iya.

Iya minta bala kaban SDNU ransing agi bejalaika tanggungpengawa sida lalu anang ngarapka nama-nama perais tauka minta balas.

“Gerempung tu endang ari pengingin kitai empu lalu nadai nama-nama perais. Nama utai ke pemadu beguna, kitai ngemansangka SDNU tu setipak enggau juluk sereta batang pekara ke deka dikereja ungkup semua bansa Dayak ke dikuasa iya,” ku iya.

Nangkan nya, iya mega ngelalau bala ketuai unit dikuasa SDNU Pampang Sibu terus ngiga kaban lebih agi ba raban sida ke nembiak.

Udah nya, iya bisi nangkan bala kaban SDNU ngambika enda berasa asa nyema sida nadai kena pilih mangku nama-nama tanggungpengawa dalam SDNU Pampang Sibu.

“Enti ulih enda ibuh berunding pasal tanggungpengawa nya nadai tentu besai guna. Pengingin enggau pemagas ngereja pengawa nadai ngarapka perais nya baru utai ke pemadu beguna dalam SDNU,” ku iya seraya madah SDNU Pampang Sibu diatu ngembuan lebih ari 1,000 iku kaban ari 13 bengkah unit.

Berebak enggau nya, Tengku madah SDNU Pampang Sibu deka ngatur Hari Diri Sebilik di Samalaju, Bintulu kena 13 November tu ila.