KUCHING: Perintah deka nentuka sabsidi minyak ke diberi ngelama tu mulaika pemaik ngagai raban orang ke ditagit, lalu atur nya deka dipejalaika enggau terit belabuh bulan Jun taun baru.
Menteri ba Opis Menteri Besai Nancy Shukry madah sabsidi minyak sigi ungkup raban orang ke kurang pemisi lalu raban orang ke bepenatai pemisi deka mayar minyak rega ke nadai sabsidi nitihka atur nya.
“Aku baru ninga berita tu nengah ‘online’ ke alai orang ke ngembuan pemisi deka meli RON95 ngena rega ke nadai sabsidi tang taja pia aku enda entu nemu sekalika penerang tu amat tauka enda.
“Atur tu deka dipejalai taun baru lalu perintah deka nentuka orang ke kurang pemisi ngasaika sabsidi tu. Ngelama tu semua orang enda ngira tikas penatai pemisi sama bela ampit ngasaika sabsidi tu.
“Diatu kitai deka meda sabsidi tu meri pemaik ngagai raban orang ke ditagit lalu sida ke bepemisi deka mayar nitihka rega markit, nadai sabsidi. Taja pia, aku semina macha penerang tu ba media rama lalu nadai meda menteri mansutka penerang tu,” ku iya.
Nancy mansutka jaku tu lebuh dikerandau pemberita pengudah ngulu pengawa bejadika portal www.wanitapbb.my ke dikemujur Dato Sri Empiang Jabu ba Indu Opis PBB Jalai Bako, ditu kemari.
Iya dipinta ngenang penerang ari Sapit Menteri Pekara Wang Datuk Ahmad Maslan Hari Empat tu tadi ti madah rega RON95 ungkup orang ke bepenatai pemisi besai deka nitihka rega markit, ke nadai sabsidi.
Nitihka penerang nya, Maslan madah chara bejalaika atur nya benung diperundingka Opis Menteri Dagang Dalam Menua, Koperasi enggau Orang Bebeli Barang sekalika deka ngena MyKad tauka kad bukai.
Iya madah, orang ke mit penatai pemisi tauka umbas iya pemisi mengkang deka ngasaika sabsidi minyak RON95 ari perintah nya.
Nancy sekali agi madah diri enda tentu nemu pengamat penerang nya, tang semina mantaika penemu diri empu aja.
“Aku semina meri penemu ke baka tu ketegal aku meda penerang senentang sabsidi tu bisi pansut ba media rama. Aku nemu kati asai enti penerang tu enda amat ketegal aku udah kala nempuh pekara ke baka tu.
“Tang enti penerang tu amat, nya meh fomula ke dikena perintah ngambika sabsidi minyak tu mulaika pemaik ngagai raban orang ke ditagit,” ku iya.