Nansian: Aku pengari rayat BN

0

Dikarang Rengenyan Labang //

Enti kita amat deka nemu penuduk aku, datai meh ngulu Aum Kunsil Nengeri ke deka diatur dalam bulan baru tu ila

BAU: Sapit Presiden Parti Tenaga Rakyat Sarawak (Teras) Datuk Peter Nansian Ngusie minta sekeda orang ti madahka iya ukai ari perintah Barisan Nasional (BN), datai ngulu Aum Kunsil Nengeri ke deka diatur bulan baru tu ila.

Ku Nansian, maya aum nya ila orang ti madahka iya ukai pengari perintah BN ulih meda iya sekalika sepenuduk enggau penyakal tauka ukai.

Tang ku Nansian, ngelama tu iya meri servis ngagai rayat nengah pangku pengawa nyadi pengari rayat ti ngarika perintah BN.

“Baka sehari tu, tuju program kitai iya nya ngagihka ungkup belanja ari perintah BN ti diarika pengari rayat, lalu tu ungkup belanja ti kedua diagih dalam taun tu. Reti nya aku bejalaika tangunggpengawa perintah lalu endang agi nyadi Kaban Kunsil Nengeri (ADUN).

“Nya alai ngagai sekeda orang ti madahka aku ukai enggau BN, aku minta kita datai ngagai Kunsil Negeri (DUN) maya Aum Kunsil Nengeri bulan November tu ila, lalu meda dini endur Teras duduk, sekalika enggau kaban penyakal tauka BN,” ku iya ke mega Kaban Kunsil Nengeri (ADUN) sitak Tasik Biru.

Nansian ti nyadi Menteri Muda Pemansang Industri mansutka pekara tu lebuh bejaku ba pengawa nyuaka geran Projek Mit Pemansang Menua Pesisir (MRP) ti diatur ba Dewan Suarah Bau ditu, kemari.

Nambahka nya, iya madahka timpuh tauka pengelama seseiku pengari rayat mangku pengawa nyadi pengari rayat bepanggai ba perintah BN sereta sukung ari rayat.

Ku penemu iya, pengari rayat dalam komponen BN enda patut ngeruga runding rayat enggau pekara ti enda patut.

“Endang amat semua pengari rayat bejalaika pengawa dalam lima taun tauka sepenggal aja, udah nya lalu bisi pengawa bepilih, enti nuan manah bejalaika pengawa sereta ulih menang ba pengawa bepilih tentu BN deka milih nuan baru nyadi chalun.

“Semua nya bepanggai ba perintah BN, nya alai anang ngeruga runding rayat,” ku iya.

Kelimpah ari nya, lebuh ti ngenang atur program makai lemai Parti Demokratik Progresif Sarawak (SPDP) Tasik Biru ke dikena ngiga penganti iya, Nansian madahka nya pekara ti manah, laban enda belalai.

Iya madahka diri enda nagang mensia mayuh ngulu pengerami nya, ngambika iya nemu sapa bagi ke nyukung tauka enda.

“Ba surat kabar apin lama ke udah, aku bisi macha SPDP deka ngatur pengerami makai lemai di Singai malam tu (kemari), lalu tuju pengerami nya diatur endang dikena ngiga penganti aku. Manah amat laban sida udah terang madahka tuju pengerami nya.

“Reti nya sapa ti ngulu pengerami nya endang nyukung pengawa  deka nyilih aku. Enti kita deka datai nadai salah nya bepanggai ba kita, aku enda ringat.

“Tang bebendar aku madah ditu, seagi aku nyadi pengari rayat aku endang bejalaika pengawa nyadi pengari rayat ngarika perintah BN, enti deka nyilih aku semua nya bepanggai ba perintah BN enggau rayat,” ku iya.