MIRI: Palan Transformesyen Menua Pesisir (RTC) Sibuti diatu udah 90 peratus tembu sereta diadang berengkah diguna enda lama agi.
Kaban Parlimen (MP) Sibuti, Ahmad Lai Bujang (gambar) madahka palan transformesyen nya deka dipejadi urung taun baru tu ila.
“Diatu palan nya udah tembu 90 peratus sereta deka berengkah diguna penembu pengawa masang perengka karan ba palan nya,” ku iya.
Iya mansutka jaku nya lebuh ditanya pemberita Utusan Borneo bekaul enggau RTC Sibuti lemai Hari Lima tu tadi.
Naka ke diatu, entara ejensi enggau opis ke udah besedia deka bejalaika operasyen di RTC tu nyengkaum Opis Pengerijista Raban Bansa (JPN), Agrobank, Kompeni Penerebai Bilun Malaysia Airline System (MAS), Majlis Amanah Rakyat (MARA), Lembaga Kemajuan Ikan Malaysia (LKIM) sereta ejensi ke bukai.
Nitihka perambu, Ahmad Lai madahka diri deka nganggauka Menteri Besai (PM) Menua Malaysia Datuk Seri Najib Tun Razak bejadi Palan Transformesyen Menua Pesisir nya ila.
Tang taja pia ku iya, diatu agi nganti pemutus timbal ari PM bekaul enggau peminta nya.
RTC sebengkah ari palan mantu mensia mayuh kelebih agi rayat di menua pesisir ke ditumbuhka baruh Strategi Lautan Biru Kebangsaan 4 (NBOWS4) ke terubah iya diperambuka nyadi Institut Strategi Lautan Biru Malaysia (MBOSI).
Tuju penumbuh palan tu, iya nya deka nyadika jematan dikena rayat menua pesisir nyungkak pemanah tikas pengidup sida nyengkaum ngenikika tikas ekonomi enggau penatai pemisi.
Opis Menteri Pemansang Menua Pesisir enggau Kandang Menua (KKLW) sereta Opis Menteri Bumai enggau Industri Betanam Betupi diberi tanggungpengawa dalam ngatur sereta bejalaika program nya.
Kelimpah ari nya, program nya mega bulih sukung ari Opis Menteri Pelajar Tinggi, Opis Menteri Pengerai sereta Opis Menteri Pekara Wang.