Nengah sukung pengundi di Singai, SPDP andal mujur ngerebut kerusi Tasik Biru maya pengawa bepilih ila
BAU: Penatai lebih 1,000 iku orang ba ‘Malam Perpaduan Parti Demokratik Progresif Sarawak (SPDP) Singai/Adis’ malam ensanus mandangka SPDP mengkang tegap ba sitak Kunsil Nengeri (DUN) Tasik Biru.
Pemangku Presiden Parti Demokratik Progresif Sarawak (SPDP) Datuk Seri Tiong King Sing madah, ba pengawa bepilih besai ke udah, rayat sereta orang ke nurun ngundi di menua Singai meri sukung ke tegap ngagai chalun SPDP Anthony Nogeh ti diatu nguasa kerusi Parlimen Mas Gading.
Nengah lebih 4,000 undi di Singai, iya ngarapka raban pengundi di Singai ulih meri enda kurang ari 1,000 majoriti undi ungkup chalun SPDP maya pengawa bepilih ngerebut kerusi N.2 Tasik Biru ila.
“Aku enda ngenggaika mayuh pengilap sereta pengurang udah diasai ngelamatu, tang diatu aku chukup gaga meda pengawa pengari rayat kitai di Mas Gading chukup regas bejalaika gawa taja pan napi mayuh pemar.
“Tu meh semengat ke deka dipeda aku ba pengari rayat enggau ketuai dalam SPDP, sida angkun meri servis enggau naka ulih lalu enti bisi penanggul, pekara nya deka dikerandau enggau Kaunsil Komiti Besai (MKT) ngambika diputar enggau lengkas,”ku iya ba pengerami nya.
Tiong nambah, semua udah nemu tuju penumbuh Parti Tenaga Rakyat Sarawak (TERAS) ti diarika raban ketuai ti udah ningkilka diri ari SPDP.
Ku iya, aku deka ngelalau semua kita ke diau di Singai ditu dia kitai ke ngaul diri ba pekara politik ukai ketegal deka nguntungka diri tauka ngintu pengelantang ruang bilik aja.
“Kitai ke nyadi orang politik enggau ketuai ke udah dipilih rayat patut ngintu pemaik semua rayat ba kandang endur ke dipegai diri lalu ukai ungkup pemaik diri sebilik aja.
“Berindik enggau nya, kita ke diau di Singai/Adis patut pintar mida ni bagi ke patut disukung lalu anang mudah pechaya enggau berita selebubu aja,”ku iya.
Ba pengerami nya, Tiong ke mega Kaban Parlimen Bintulu enggau Duta Khas Menteri Besai ngagai Asia Timur ngelalau rayat enggau chalun SPDP ngambika suah agi begulai enggau rayat.
Ku Tiong, Barisan Nasional (BN) seruran nemu pengawa ke dikereja tiap raban ketuai di tiap kandang endur.
Ungkup pemaik parti enggau BN, Tiong minta kerejasama ari parti bukai dalam serakup BN baka ke Parti Rakyat Sarawak (PRS), Parti Rakyat Bersatu Sarawak (SUPP) enggau Parti Pesaka Bumiputera Bersatu (PBB) ngambika serakup majak tegap lalu sedia napi pengawa bepilih nengeri ti deka datai.