PAMPANG BARU SDNU: Rayong (dua kanan) baru udah nerima tepa ari Inchang (kanan) seraya dikemataka Banyan (dua kiba) enggau TR Bak (kiba).
ENGKILILI: Serakup Bansa Dayak Sarawak (SDNU) diatu udah numbuhka pampang baru SDNU iya nya SDNU Pampang Engkilili-Skrang ke dipasuk 56 pintu ruang bilik peranak Rumah Bak Sebeliau Panjai ditu, kena Hari Minggu tu tadi.
Kaban Kunsil Nengeri (ADUN) Engkilili Dr Johnical Rayong Ngipa madah, nengah urung 500 iku kaban ke baru masuk gerempung, iya pechayaka pampang baru tu ulih matak mayuh kaban ejensi perintah enggau NGO peranak menua nya ari raban bansa Dayak.
Rayong mansutka pengaga ati iya suh Ex-Menijar Komiti Penyerakup enggau Pengintu Tanah Sarawak (SALCRA), Inchang Ancheh berindik ari iya ke dipaduka nyadi Ketuai SDNU Pampang Engkilili-Skrang.
Inchang ngembuan pemagas dalam pengawa rama.
Tuai Rumah Bak Baring dipaduka nyadi Sapit Tuai SDNU Pampang Engkilili-Skrang ke mantu Inchang ngiring serakup nya sereta dibantu raban kaunsilor, raban pengajar, pengulu enggau tuai rumah ke nyadi kaban gerempung nya.
Raban pengiring serakup nya ke baru diadang ulih meri mayuh pemujur ngagai serakup nya berindik ari SDNU Pampang Engkilili ke lama udah dikemadu beberapa taun ke udah.
Penerang nya dipansutka Rayong ke mega nyadi Penyanding Penemu Sentara serakup nya.
Seiku agi Penyanding Penemu Sentara iya nya Kaunsilor Nyambung Maweng.
“Aku pechayaka raban baru serakup tu ulih bejalaika pengawa enggau manah begulai enggau raban NGO sereta ejensi perintah dikena mantu raban bansa Dayak kelebih agi dalam pekara pelajar enggau adat bansa,” ku Rayong.
Iya mansutka jaku nya lebuh bejadi pampang baru serakup nya ke digulu urung 500 iku mensia ari 36 buah rumah panjai di kandang menua nya.
Entara pemesai ke bisi datai ba pengawa nya, Sapit Presiden SDNU Anthony Banyan.
Kelimpah ari nya, raban komiti sentara ke bisi datai nyengkaum Peter Jawi (sekretari), Kaunsilor Nyanau Ramba (Sapit Sekretari), Jensen Ancheh (Tukang Wang), Jumoi Balak (Sapit Tukang Wang), Pengulu Gerang Ancheh, Pengulu Bangkong Upok, TR Sintan Undik, TR Narok Ran, Seliman Leka, Sebang Ancheh, Gembar Selat, Kaunsilor Maritian Melintang, Kaunsilor Engkabi Jamu, Kaunsilor Bangkong Maweng sereta Kaunsilor Chaong Meringai.