Ketuai raban bansa ti ngembuan pengangkun ngemuntangka perintah bejalaika atur pemansang
ENGKILILI: Kaban Kunsil Nengeri (ADUN) Engkilili Dr Johnnical Rayong Ngipa ngelalau bala ketuai raban bansa di DUN Engkilili seruran ngemeranka ulah berakup enggau pangan diri dikena ngemujurka pemansang ba kandang menua sida.
Ku iya, bala Temenggung, Pemanca, Pengulu enggau Tuai Rumah patut seruran nyukung polisi perintah Barisan Nasional (BN) ngambi ngemudahka mayuh agi projek pemansang diberi ngagai sitak DUN Engkilili ila.
“Iarka ulah ti semina temahaka diri ti tau ngujungka penyerekang sereta deka ngenusahka perintah nyerakupka sida jemah ila,” ku iya.
Dr Rayong bejaku munyi tu lebuh bejadika Serakup Kaunsilor, Tuai Rumah enggau Sapit Tuai Rumah ungkup kandang menua Skrang Ili-Bangat-Lidong DUN Engkilili, ba sekula Primari (SK) Lidong Skrang, kemari.
Seraban 36 iku Tuai Rumah datai ngulu pengerami ngemataka Tuai Rumah Buli dichiri nyadi Chairman lalu Kaunsilor Nyanau dipadu nyadi Sekretari serakup nya.
Beserimbai enggau pengerami nya, Dr Rayong lalu ngungkupka belanja RM10,000 ngagai serakup nya, Biro Indu Kandang Menua Bangat mega diungkup RM10,000 ditangkan enggau SABERKAS kandang menua Bangat (RM5,000).
Kelimpah ari nya, iya mega meransang bala ketuai raban bansa nyengkaum Tuai Rumah di DUN Engkilili nyadung polisi pemansang ngagai bala nembiak redak sida. Pekara nya beguna amat ngambika parti penyakal enda mudah ngerachun runding rayat ti semina nguntungka politik sida, ku iya.
“Aku arapka kita semua ulih bejalaika pengawa enggau manah ke pemansang DUN Engkilili,” ku Dr Rayong.