Nadai kebuah polis enda ulih ngurangka kes jai

0

Enggau penyampau 1,226 iku raban polis di Kuching, nadai kebuah mayuh kes jai nyadi, ku Wong

Dikarang Chris Bishop //

KUCHING: Penyampau 1,226 iku raban polis di Kuching diasai chukup ngemataka pengelikun sereta pengelantang urung 700,000 peranak mengeri tu lalu nadai kebuah kes penyalah jai tau nyadi enti sida amat bejalaika tanggungpengawa, ku Kaban Kunsil Nengeri (ADUN) Padungan Wong King Wei.

Bejaku ba sebengkah aum pengarang berita ba Indu Opis DAP ditu kemari, Wong madah, statistik penyampau raban polis nya dibantaika rambau Aum Dewan Undangan Nengeri bulan November 2013 lalu nya enda nyengkaum 1,047 iku ke ngereja pengawa bukai ba Indu Opis Pelilih Kuching (IPK).

Kesal enggau kes penyalah jai ti majak nyadi, Wong minta Ketuai Polis Pelilih Kuching  nerangka ngagai mensia mayuh tanggung pengawa ti udah diungkup ngagai tiap iku raban polis di mengeri tu.

“Enti kitai magi manah penyampau tubuh raban polis enggau penyampu mensia ke nguan mengeri Kuching diatu, seiku polis ngintu pengelikun 570 iku mensia tauka pukul rata 1:570.

“Bepelasarka asil pansik Biro Pemansik enggau Pemansang Polis India, pukulrata ke pemadu engkeman iya nya 1:568. Reti nya kitai di Kuching ditu enda jauh ari setindit nya.

“Berindik ari nya, nadai kebuah polis kitai ditu enda ulih ngintu tauka ngurangka kes penyalah jai nyadi,’ku iya.

Opis polis di Kuching bisi 1,226 iku personel tambah 1,047 ba IPK. . . dini sida, nama pengawa sida??, tandu Wong.

Iya nambah, kes enchuri, ngeruntun beg enggau kes penyalah besai bukai udah majak nyadi di Kuching lalu bepelasarka penyampau tubuh raban polis diatu, nadai kebuah sida enda ulih ngintu pengelikun di mengeri tu.

“Nya alai aku deka nemu kati chara KPD Kuching nusun pengawa raban polis. Nama pengawa sida, berapa penyampau ke ngintu pengelikun, berapa iku nasat kes enggau berapa iku bejalai mantau mengeri,’ku Wong.

Kelimpah ari nya, Wong ke mega Ketuai Nembiak DAP Sarawak ngansak raban polis proaktif bejalaika tanggungpengawa lalu enda nganti pengudah kes nyadi.

Ku iya, chara pemadu engkeman ngintu kes penyalah jai ari ke nyadi iya nya nengah chara nyeliahka pekara nya nyadi.

“Raban polis patut suah agi matau tiap kandang endur dalam mengeri tu,”ku iya.