Pengerembai teknologi ngemuntangka penanggul rama

0

KUCHING: Pengerembai perengka teknologi pemadah baka ke diatu, endang pemansang dunya  moden tang taja pia, penanggul ke ditapi berindik ari efek pemansang rama ba komuniti.

Menteri Muda Penyambung Sarawak Datuk Lee Kin Shin madah, lebuh kitai beratika transformesyen pengawa rama, endang patut kitai mansik efek pemansang teknologi dalam pengawa rama, iya nya, pendiau kitai besesehari ti ngemeratka penyerakup, kaul, bekunsi penemu sereta pemereti ati dalam komuniti.

“Pemansang teknologi moden baka ke diatu ukai semina meri tempias ba komuniti tang tau bendar nyerekang kaul ruang bilik.

“Pendiau kitai mayuh pengiruh bebalut enggau gadget elektronik baka telefon binching pintar, iPads, komputer rumpas, TV, komputer, injin elektronik enggau mayuh agi perengka bukai.

Iya madah munyi nya lebuh bejaku ba atur pengawa bejadika Aum Transformesyen Pengawa Rama enggau bengkel 2014 ti diatur Opis Kaunsil Pemansang Pengawa Rama (MPS), Opis Menteri Pemansang Pengawa Rama ti mega digulu Sekretari Eksekutif MPS Aishah Edris ditu, kemari.

Lee ti mega Menteri Nembiak, Lumba enggau Main madah, berindik ari nya, bisi pemerat mansik efek ngena gadget elektronik moden ke majak mayuh dalam aplikesyen teknologi moden ke bisi efek rama

“Efek bansa tu patut dipansik laban iya ulih ngubah chara pendiau kitai lebih agi ngiarka mayuh penanggul pengawa rama ti deka nyadi ila,” ku iya.

“Ambi ke chunto, pengawa beripai dalam  komuniti patut dikemeratka semua kitai seraya ngenegapka kaul entara sama diri.

Nangkan ke nya, Sekretari Mendam Opis Menteri Pemansang Rama (KPS) Affandi Keli dalam jaku iya nengah teks ti dibacha Aishah madah, aum sereta bengkel nya digaga, kena nyendiaka siti palan bejuraika penemu endur mansik kuing pemansang komuniti diatu.

Aum sereta bengkel ti belabuh kemari, deka mantaika semilan keretas kereja sereta digulu ulih urung 180 penyereta.

“Ngarapka semua penyerta ti bisi ditu, ulih meri penemu sida kelimpah ari bejuraika keretas kereja kena mutarka transformesyen pengawa rama ke majak nyadi diatu,” ku iya.