TANDA JARI: Ting (kiba) betukar penerang sempekat ngagai Abdul Hakim seraya dikemata Wong (tengah) enggau bala bukai di Sibu, kilah ensana.
SIBU: Penumbuh Universiti Kolej Teknologi Sarawak (UCTS) di Bandar Sibu udah mutarka penanggul raban apai indai nganjung anak sida nampung pelajar tinggi ke menua bukai.
Menteri Wang II Dato Sri Wong Soon Koh madah, UCTS nyediaka perengka pelajar ke engkeman ti disempulang enggau pengawa ngajar ti chukup peneleba nejuka iya bela tikas enggau palan pelajar tinggi ke bukai.
“Nya alai nama kebuah kitai deka nganjung anak ngagai menua bukai baka ba Kuala Lumpur ngelayang tasik China Selatan.
“Ba UCTS udah chukup engkeman alai anak kitai nampung pelajar,” pia ku iya bejaku maya ngemataka penyawa nyain sempekat entara UCTS enggau Gerempung China (UCA) Sibu ditu, kilah ensana.
UCA diarika Presiden Ting Huat Chie lalu UCTS diarika Sapit Canselor Profesor Dato Dr Abdul Hakim Juri.
UCTS diatu udah nyediaka semilan bengkah program iya nya Kejuruteraan, Kejuruteraan Awam, Komputer Sains, Pengurusan Perniagaan, Perakaunan, Arkitek, Kuantiti Survei enggau dua bengkah program asas iya nya Sains enggau Kesenian.
Wong madah, UCTS mega deka nyediaka dua bengkah program baru iya nya Teknologi Makanan enggau Kejuruteraan Mekanikal ba taun 2015 ti nyungkak penyampau nembiak ba UCTS ke diatu urung 600 iku.
“Kitai ngembuan tuju ti bebatang iya nya deka ngangkatka universiti tu nyadi universiti ti pemadu manah ba menua tu,” ku iya ti mega Menteri Kunsil Kandang Menua enggau Pemansang Raban Bansa.
Berindik ari pekara nya, iya minta semua rayat Sibu meri sukung ngagai UCTS ngambika universiti nya majak betambah pegari.
“Universiti ukai semina diungkupka ngagai rebak diatu tang mega mai penguntung ngagai rebak dudi. Rayat Sibu patut berasai temegah ati enggau pekara tu,” pia ku Wong.
Kaban Kunsil Nengeri (ADUN) Bawang Assan nya mega ngenggaika ulah sekeda orang ti bejai universiti nya lalu minta sida badu ngaga petenah agi.
Perintah ku iya, udah bebendar numbuhka universiti nya ke diatu benung digaga ba renggat kedua ti nejuka iya nyadi palan pelajar tinggi pemadu manah ba nengeri tu dalam kandang 10 ngagai 20 taun ti deka datai.
“Taun seiti ti deka datai, UCTS mega deka ngambi nembiak ari menua bukai. Keterubah iya kitai deka ngambi nembiak ari menua China lalu ditangka Indonesia, Vietnam lalu tau mega ari menua Korea Selatan enggau Jipun,” ku iya madahka baru.