SRI AMAN: Pemanah sereta tukuh rumah panjai ke ngembuan atur ‘rumah panjai asal’ sereta ‘moden’ di nengeri tu dipeda ulih matak mayuh raban mensia datai nemuai ngagai rumah panjai di nengeri tu sekalika ari dalam tauka luar nengeri.
Menteri Muda Pengawa Berumah Sarawak, Datuk Francis Harden Hollis madah, pemanah asal rumah panjai di nengeri tu patut dijaga enggau manah laban nya sebengkah ari pekara ke chukup berega ngagai semua rumah panjai ke ngembuan atur nya.
Nitihka penerang Harden, tajapan piak Menteri Pengawa Berumah Sarawak bisi nyendiaka sebengkah pakej baru ke dikumbai ‘Pakej Pinjaman Perumahan Rumah Panjang Mesra Rakyat’ pun taun tu tadi, tang pelin tauka atur asal rumah panjai nya patut dikenegap sereta enda ibuh diubah.
“Tajapan rumah panjai ke deka digaga nya begunaka ‘Pakej Rumah Panjang Mesra Rakyat’, tang kitai patut nyaga pemanah asal sesebuah rumah panjai laban nya sebengkah ari pekara ke chukup berega.
“Raban temuai ari dalam enggau luar nengeri tu mega rindu bejalai sereta nemuai ngagai rumah panjai ke bisi di nengeri Sarawak. Sida rindu meda pemanah enggau pemadas rumah panjai asal sereta pelin rumah panjai lama tajapan mayuh rumah panjai baru sereta moden udah mayuh dipeda kemaya hari tu,” ku iya.
Harden ke mega Kaban Kunsil Nengeri (ADUN) Simanggang mansutka jaku nya lebuh bejaku ba sebengkah awak beserimbai enggau program penamuai iya ke Rumah Abang Akun, Kampung Kedang, Sri Aman ditu, lemai kemari.
Kelimpah ari nya, Pakej Pinjaman Perumahan Rumah Panjang Mesra Rakyat ke udah dikenukuka taun tu tadi nya sebengkah skim baru ke diungkupka perintah ngagai rayat ke diau di rumah panjai sereta udah dikemendarkan Opis Menteri Pengawa Berumah.
“Opis Menteri Pengawa Berumah mega udah ngemendarka agih belanja “Pilot Project” ungkup skim tu ke beungkus RM 2 juta ngagai Rumah Collin di Miri pun taun tu tadi,” ku iya nandu.
Pelin rumah panjai baru nengah konsep ke dikenataika perintah nya patut digaga pemadu mimit 10 buah pintu ungkup sebuah rumah panjai sereta palan alai ngaga rumah panjai nya patut disukat lalu diberi kelai ungukup tetiap pintu bilik dalam rumah panjai nya.
“Ungkus belanja dikena ngaga rumah panjai nya mega patut nitihka atur ke bisi disediaka Housing Development Corporation (HDC) ke nyengkaum tiga buah bilik tinduk, ruai, bilik besai, dapur sereta jamban.
“Ungkus belanja dikena ngaga rumah nya udah ditetapka entara RM 70,000 ngagai RM 100,000 sereta timpuh ke diberi dikena mayar pinjau belanja nya udah ditetapka 25 taun. Rumah nya deka digaga ari semin sereta digaga setingkat aja,” ku iya.
Harden ngelalau rayat ke diau di rumah panjai di nengeri tu enda muai peluang tauka awak nya. Sida dipinta ngenataika peminta nya laban mayuh penguntung ulih diasaika rayat rumah panjai berindik ari skim nya.
Harden mega bisi nyuaka geran perintah ke beungkus RM 8,000 ngagai Komiti Pemansang enggau Pengelikun (JKKK) Rumah Abang dikena sida bejalaika aktiviti sepanjai taun.