49 pintu ruang bilik di Bengoh agi diberi awak berunding pemutus kepenudi, ku Jerip

0

KUCHING: Kira 49 pintu ruang bilik ke enggai mindah ngagai Skim Berumah Baru Bengoh (BRS) agi diberi awak endur sida meri jaku putus kepenudi.

Penerang nya dipansutka Menteri Muda Pengerai Rama Datuk Dr Jerip Susil (gambar).

“Ngagai sida ke enggai mindah ari genturung pendiau asal, perintah enda ngansak sida mindah ari nya.

“Tang taja pia, kitai ngarapka sida tu setuju mindah dudi ari ila. Rumah sereta utai ditanam deka diberi ngagai sida,” ku Jerip.

Iya mansutka jaku nya lebuh nyadung pom ngerijista nyadi kaban Parti Rakyat Bersatu (UPP) di Kampung Rejoi Baru di BRS ditu, empai lama ke udah.

Dr Jerip ke mega Kaban Kunsil Nengeri (ADUN) Bengoh bejaku ngenang 49 buah ruang bilik ari Kampung Taba Sait, Kampung Rejoi enggau Kampung Pain Bojong di Ulu Bengoh ke patut dipindahka ngagai BRS pengudah genturung pendiau asal sida ke dikemansangka enggau numbuhka Tekat Ai Bengoh ke beungkus RM310 juta.

Berindik ari projek nya, perintah udah ngaga palan pengentap pendiau ke baru ungkup sida ke kena parit projek nya ngilah ke ulu enda jauh ari genturung pendiau asal sida.

Semua ruang bilik ari Kampung Semban sereta ke bukai udah mindah ngagai BRS.

Sebedau tu, Menteri Perambu Sumber enggau Rampa Menua Kedua Datuk Amar Awang Tengah Ali Hasan mega bisi ngerah raban nya nengah media minta sida mindah lengakas ngagai palan ke udah disediaka dikena ngemujurka pejalai projek nya ngambika enda tepekuh ngapa laban projek nya diadang tembu urung bulan November taun baru tu ila.

Dr Jerip ngarapka ruang bilik tauka sida ke kih nya mindah enggau lengkas ngambika anak sida ulih ngasaika pengelantang berindik ari mayuh perengka infrastruktur nyengkaum rumah, kuasa karan, bekal ai beresi, sekula primari, jalai alun sereta palan alai betanam sayur enggau buah.

“Sida patut nemu pemerat enggau penyiru ke deka dikenataika perintah dikena mantu sida ngambika ulih ngasaika pengelantang enggau pemansang lebuh ke diau di BRS enti dibandingka enggau genturung pendiau asal ke diuan sida sebedau tu.

“Nya alai, aku pechaya ka sida deka muka runding enggau pikir sida sereta ngeradang awak pemansang ke bisi disediaka perintah di BRS,” ku iya.

“Mayuh ejensi perintah deka mantu sida bejalaika pengawa nyengkaum nulung nyendiaka awak bedagang asil utai ke ditanam sida,” ku iya nandu.

Nangkanka nya, Jerip mega madahka Menteri Pemansang Infrastruktur enggau Penyambung Dato Sri Michael Manyin deka datai ke BRS kena 4 November tu lalu berebak enggau nya ila iya deka nyauka bantu belanja ngagai sida ke udah mindah ngagai palan nya.

Nitihka penerang ari media, urung RM1,830,000 agih belanja udah diungkupka perintah ngagai 204 buah ruang bilik ke udah mindah ngagai palan nya.