KUCHING: Seiku deriba lori mukut nembiak universiti peribit ditu sereta nungaka ujung senapang nuju menyadi indu nembiak nya pengudah ke nyadi sebengkah kes eksiden entara entukar ke dikena seduai iya di Jalai Foochow No 1 ditu, kemari.
Penerang polis madah, kes nyadi pengudah cheremin tisi kerita ke ditepan nembiak beumur 19 taun nya enggau menyadi indu iya diripotka kena lantak lori nya.
Iya madah nembiak nya enggau menyadi indu iya terus pansut ari kerita seduai laban deka bejaku enggau deriba lori nya, tang deriba lori nya ditusika terus nyerang nembiak nya sebedau ke tama baru ngagai lori nya lalu ngelantak mua kerita nembiak nya.
Nangkan ke nya, deriba lori nya bisi mantaika senapang angis lalu nungaka ujung senapang nuju menyadi indu nembiak nya sebedau ngachitka senapang nya ke langit, sereta ngelarika diri ngena lori nya.
Penerang nya madah, orang ke deriba lori nya beumur 50 taun sereta udah dikelala. — Bernama