KE PENGINGAT: Tengah enggau Norman (tujuh enggau lapan kanan) sereta raban bukai begambar nyadi pengingat pengudah meresa pengelikun Jematan Baru Sungai Lawas ke nelan belanja RM 30 juta di Lawas, empai lama ke udah.
LAWAS: Sebuah jematan baru di Sungai Lawas diatu udah tembu digaga, ku Menteri Perambu Sumber enggau Rampa Menua Kedua Datuk Amar Awang Tengah Ali Hasan.
Berebak enggau nya iya minta piak ke udah dipaduka ngaga jematan nya bejalaika pengawa meresi sereta meresa pengelikun dikena nentuka jematan nya likun ditengah mensia mayuh sebedau ke ulih dikemendarka ditengah mensia mayuh di menua nya.
Iya ti mega nyadi Kaban Kunsil Nengeri (ADUN) Bukit Sari bisi bejalaika pengawa meresa jematan nya begulai enggau Injinir PWD Lawas Norman Jan sereta raban bukai, empai lama ke udah.
Iya chukup tekenyit meda mayuh batu ngachir ba atas jematan nya ke ulih ngeruga pengelikun mensia mayuh ke betengahka jematan nya ila.
Berindik ari nya, iya minta Norman ngangauka raban ke bejalaika pengawa ngaga jematan nya meresi sereta ngiyarka batu ke nekul jalai ba jematan nya.
Projek ngaga jematan enda jauh ari Kampung Pengalih nya beungkus RM 30 juta sereta mujur ditembuka dalam bulan ogos taun tu tadi pengudah ke tejanggal sebedau tu.
Projek ngaga jematan nya dipejalaika LFC Construction Sdn Bhd sereta betuaika Opis Kereja Raya (JKR) Wilayah Utara enggau ari bantu Perunding Hazat Sdn Bhd.
Perintah menua ngemendarka projek ngaga jematan nya ke ngembuan dua buah lurung nukar jalai seiti lurung sebedau tu ke digaga urung taun 1960 menya nitihka chara Colombo.
Jematan nya diadang deka dikemendarka ditengah mensia mayuh pengudah bisi pemendar ari PWD ke alai jematan nya likun ditengah.
Nangkanka nya, jematan nya ila deka meri pengelantang ngagai mensia mayuh ke betengahka jalai nya ari nengeri Sabah enggau Sarawak nyengkaum ari menua Brunei ke nengah menua Lawas.
Taja pia, jematan ke lama nya deka dikemanahka agi dikena meri pengelantang ngagai rayat di menua nya.