Kualiti kaunsilor di Sarawak patut dikemanahka agi

0

NYADIKA PERANSANG: Bala penerima anugerah begambar nyadika pengingat pengudah nerima anugerah diri empu maya Pengerami Makai Lemai Aum Entarabansa Kaunseling (MICC 2014) ba sebengkah hotel ditu, malam ensana.

KUCHING: Kepala Menteri Datuk Patinggi Tan Sri Adenan Satem minta kualiti kaunsilor di nengeri tu dikemanahka agi seriris enggau juluk menua tu deka nyapai status menua maju.

Sentang pekara tu, ku iya kaunseling endang entara bidang pemungkal ke nyadi pemun dalam nempa modal mensia ke menyana.

Tu nyengkaum servis kaunseling enggau iring embing ari institusyen pelajar tinggi, ba palan endur gawa sereta ba pendiau pengidup rayat empu, ku iya.

“Nengah servis kaunseling ke mujur sereta meri bekau, kitai ukai semina ulih mutarka penanggul ke bisi nyadi dalam organisasyen raban bansa enggau ruang bilik, tang mega ulih nempa pemintar enggau pemandai seseiku orang landik ngatur pendiau diri.

“Kelimpah ari nya, seriris enggau ubah pemansang ke maya hari, kitai betapi enggau mayuh pemar baru ke endang ditemu bisi ngundan pekara enda manah sereta ngeruga institusyen raban bansa.

“Nya alai, raban bansa patut diajar sereta diiring ngambika tau nulung sida ngintu pendiau diri lebih agi maya napi pekara ke pedis,” ku iya.

Adenan madah munyi nya ba teks iya ke dibacha Menteri Muda Pelajar Tumu Anak Mit enggau Pemansang Raban Bansa Rosey Yunus rambau bejadi Pengerami Makai Lemai Aum Entarabansa Kaunseling (MICC 2014) ba sebengkah hotel ditu, malam ensana.

Adenan mega madah, raban kaunsilor nyengkaum raban pakar akademik enggau profesional kaunseling patut pintar mantu mensia mayuh awak pulaika pemanah pendiau sida.

“Endang udah nyadi pekara ke dikearapka aku, ngambika mayuh agi atur dipejalaika semua ejensi dalam ngemanahka pekara bekaul enggau kaunseling di selampur nengeri Sarawak kelimpah nambahka pengulih kitai dalam nempa mayuh agi kaunsilor dudi hari,” ku iya.

Aum diatur pengelama dua hari nya diatur begulai entara UNIMAS enggau Gerempung Kaunseling Antarabansa Malaysia (PERKAMA INTERNATIONAL), Opis Pengereja Pengawa Perintah (JPA) sereta Gerempung Pemesai Psikologi Servis Opis Perintah (PSIPA).

Berambaika jaku “Best Practices for Best Practitioners in Counselling Services”, aum ti terubah iya diatur ba Kuching tu bisi mantaika penemu sentang isu ke nyadi ke maya hari bekaul enggau bidang kaunseling.

Tuju aum tu diatur mega awakka nyadi pelasar ngagai bala kaunseling, pakar akademik kaunseling sereta profesional bekunsi penemu dikena ngemansangka kaunseling di nengeri tu.

Sama bisi datai Mandal Chanselor UNIMAS Datuk Profesor Dr Mohamad Kadim Suaidi, Presiden PERKAMA INTERNATIONAL Datuk Dr Ismail Alias, Direktor Psikologi JPA Profesor Madya Dr Abdul Halim Mohd Hussin enggau Presiden PSIPA Dr Abdul Jalil Hassan.

Berebak enggau pengerami makai lemai nya bisi diatur mega pengawa nyuaka anugerah ngagai bala penerima nyengkaum Anugerah Pelajar Cemerlang, Anugerah Penghargaan Kaunselor Tempatan, Anugerah Premis Kaunseling Terbaik sereta Anugerah Penghargaan NGO.