MIRI: Pampang Nembiak SPDP meri sukung ke penuh ngagai penegap penemu Ketuai Nembiak BN, Khairy Jamaluddin Abu Bakar ti madahka penerang ke dipansut Datuk Ibrahim Ali ti deka nunu Bup Kudus ke ditulis dalam Jaku Melayu nya amat ngembuan juluk ke enda manah.
Ku Nembiak SPDP, sekalika baka ni pan Datuk Ibrahim Ali ngemansutka penerang iya, nya tetap dianggap deka betenah sereta patut didawa.
“Kitai anang enda ingat sapa iya (ektrimis) laban ulah ke udah digaga iya sebedau tu baka ke deka mejal orang bukai. Iya kala ngachuk runding ngambika orang begedika bansa enggau jalai pengarap di Semenanjung.
Ba sentang isu tu, kami (Exco Nembiak SPDP) begempung enggau Ketuai Nembiak BN, Khairy Jamaluddin enggau sekeda pampang nembiak komponen parti BN enda begilik penemu enda nerima ulah ti enggai meda bansa bukai, begedika sereta eksterim,” pia ku Pampang Nembiak SPDP lebuh ti mansutka penerang ba media ditu.
Pampang Nembiak SPDP mega nyukung penerang ti dipansut Kepala Menteri, Datuk Patinggi Tan Sri Adenan Satem apin lama ke udah ti madahka Sarawak nengah kuasa imigrasyen ti udah dikemendar Perintah Besai, deka nagang orang ari luar ke “eksterim ba jalai pengarap, begedika bansa bukai sereta deka ngaga penyarut ” tama ke menua tu tauka muru sida pansut enti sema sida udah bisi ditu.
“Nambahka nya, kami minta raban bekuasa ngelepas sereta ngemulaika 300 iti Bup Kudus ke ditulis dalam Jaku Melayu enggau Iban languages ke ditanka JAIS dalam bulan Januari 2014,” pia ku penerang nya.