LUBOK ANTU: Kaban Kunsil Nengeri (ADUN) Engkilili Dr Johnnical Rayong Ngipa arapka Gerempung Nasional Dayak Sarawak (SDNU) terus bekempit enggau perintah besai sereta perintah nengeri ngintu hak raban bansa Dayak di Sarawak.
Ku iya, bansa Dayak mengkang begunaka penyiru ari perintah dikena nyungkak tikas pengidup sida ngambika ngerembai maju jemah ila.
“Kitai semua (Dayak) patut maju sesingkang enggau bansa bukai di menua tu ngambi ulih ngasaika pemansang ari sukut pelajar, penyikap perengkaguna enggau ekonomi.
“Ari nya meh SDNU ulih bejalaika tanggungpengawa sida begulai enggau perintah ngambika semua penanggul enggau penemu bansa Dayak seruran didinga raban ke patut,” ku iya.
Dr Rayong bejaku munyi tu lebuh bejadika SDNU Pampang Engkilili/Skrang di Rumah Bak Baring, Sebeliau, Lubok Antu apin lama ke udah.
SDNU Pampang Engkilili/Skrang ngembuan 500 iku kaban ke alai Inchang Anche dikearapka nyadi Chairman, Tuai Rumah Bak Baring nyadi Sapit Chairman lalu Peter Jawie nyadi Sekreteri iya.
Kelimpah ari nya, Dr Rayong mega arapka SDNU ulih bejalaika tanggungpengawa sama ngintu adat asal enggau gaya pengidup bansa Dayak di nengeri tu.
“Aku arapka SDNU ulih begempung enggau serakup Dayak bukai di nengeri tu nentuka adat asal enggau gaya pengidup bansa Dayak enda punas,” ku iya.