NGENUAN: Chairperson Komiti Indu Rumah Karin benung nyuaka pemeri ngagai Harden (empat kiba) seraya dikemataka Karin (tiga kanan) sereta kaban JKKK ke bukai.
SRI AMAN: Rayat patut pintar belematika arus pemansang ke nyadi maya hari tu sereta nemu berunding panjai, ku Menteri Muda Pemansang Menua Pesisir enggau Pengawa Berumah Datuk Francis Harden Hollis.
Iya madah, ubah pemansang ke nyadi ke maya hari tu beguna pemintar runding awak teulihka pengidup ke menyana dudi hari.
“ Kitai patut berani nyingkang ke mua ngubah pendiau diri sereta nemu berunding panjai,” ku iya ti mega nyadi Kaban Kunsil Nengeri (ADUN) Simanggang.
Iya madah munyi nya rambau Program Nemuai ke Rumah Karin, Kampung Selepong, Sri Aman ditu, kemari.
Ku iya, jam diatu ukai maya iya rayat ngembuan runding beangan-angan, tang patut numpu ngagai penau diri baka ni deka ngubah nyadi orang ke panjai runding.
Nangkan ke nya, perintah mega udah mayuh nyendiaka mayuh bengkah projek pemansang ungkup rayat, ukai semina ba mengeri tang mega ungkup rayat ke diau di menua pesisir.
Iya madah, amat chukup rugi enti rayat enda nguna peluang nya endur ngemansangka pengidup diri.
Harden mega madah, rayat ditu patut ngetanka penyerakup anang pambar ari pangan diri laban nya tau ngemuntanka agenda politik ke dipejalaika perintah Barisan Nasional (BN).
Ba pengerami nya, Harden bisi nyuaka agih belanja RM 5000 ungkup JKKK Rumah Karin enggau RM 3,000 ungkup Komiti Indu rumah panjai nya.