Dikarang Judan Bungap
BINTANGOR: Pemutus perintah nengeri nikika duit jali ari RM10,000 ngagai RM15,000 sepintu dikena ngaga rumah panjai, seiti pemutus ke engkeman nyaup ngelempungka ungkus belanja dikena ngentak rumah baru ti majak mar ke maya hari tu.
Pengulu Augustine Pau (gambar) madah, agi mayuh rumah panjai baka ba sitak Meradong udah luya lalu patut digaga baru.
Tang ku iya, ketegal ungkus kereban nyengkaum ramu dikena ngentak nyau majak mar enda mayuh orang nyanggup ngentak rumah baru.
“Nya alai, kitai meseti beterima kasih ngagai perintah laban ke udah nikika penyampau duit jali ngentak rumah panjai.
“Pemutus tu engkeman digaga diumba enggau rega barang ke majak niki,” pia ku iya madah ngagai pengarang berita, kemari.
Sebedau tu Menteri Pengawa Berumah Datuk Amar Abang Johari Tun Openg bisi madah, penyampau maksimum duit jali ditiki manggai RM15,000 sepintu maya bejuraika Simpul Jaku iya ba Aum Kunsil Nengeri Ke-16 kena hari Dua minggu tu tadi.
Augustine mega madah, taja duit jali nya enda chukup dikena nembuka rumah tang rayat rumah panjai anang enda nguji enggau minta.
“Enti kelalu mayuh kitai nangi sekeda ari kitai nyau bepenanggul mayar lon lalu ngujung ngenataika penusah bukai nyadi.
“Rumah enda tembu tang lon mengkang enda putus dibayar.
“Tang aku pechaya rayat rumah panjai ulih mayar lon nya laban sebedau tu mega sida ngeluarka puku ti besai enti deka ngentak rumah baru,” pia ku iya ti megai lebih 90 buah rumah panjai ba sitak Meradong.
Berindik ari pekara nya, Augustine minta sida ke deka minta lon nya tau betanya ngagai Opis Pelilih Menua Meradong.
Ba pekara ti bekaul, naka bulan Oktober tu tadi, bisi 567 rumah panjai udah tembu dientak tauka dikemanahka baru ti mungkur 13,105 pintu enggau ungkus RM87.6 juta udah skim nya dipejalai kenyau ari taun 1976 suba.
Taun tu aja, bisi RM11.3 juta udah diungkupka ngagai 34 buah rumah panjai ti mungkur 753 pintu ari baruh program ngaga baru tauka ngemanahka baru rumah panjai nengah skim ‘Dana Kumpulan Wang Amanah Pinjaman Perumahan’ nya.