ASIL PENYAKAH BELAJAR: Ezra Jeremiah Tersan nerima perais nembiak ke pemadu nyulut ari Reverend Buma.
KUCHING: Tadika St Thomas Cathedral Kuching udah ngeletak juluk ke tinggi ba pelajar enti sema tadika nya deka nyulut sereta ngembuan pelajar ke bekualiti ngambika ulih besemekih.
Reverend Nelson Ugas ari St.Thomas Cathedral madah, sebarang tadika deka nyadi sebuah palan pelajar ke beguna amat endur ngiring nembiak mit, ngetanka kualiti enggau setindit ngambika besemekih.
“Tadika patut bisi palan ke kondusif ngambika ulih meri pelajar ke bekualiti, ngembuan penyikap perengkaguna ke manah lalu ke pemadu beguna iya nya dipejalai sereta diintu staf enggau pengajar ke manah,” pia ku iya lebuh ke bejaku ba pengerami Graduet sereta nyuaka perais ngagai nembiak Tadika St Thomas Cathedral Kuching, apin lama ke udah.
“Kami arapka tadika kitai ulih mandangka penyulut belama ngambika bala nembiak kitai ulih disikap enggau pemandai ke chukup dikena nyendiaka sida masuk ba pengidup ba sekula nangkanka tu ila,” ku iya.
Reverend Nelson mega arapka bala pengajar ngeletakka pemerat, setindit enggau kualiti belama seraya ngenataika pengagai ati iya ngagai Kunsil Pengatur Tadika St.Thomas Catherdral Kuching, laban ke udah chakah gawa sepemanjai taun tu.
Ku iya, Opis Menteri Pelajar seruran ngemeratka pelajar sereta ngintu nembiak ngambika sida bisi disediaka palan ke manah ba mensia mayuh.
Reverend Nelson mega meri terima kasih ngagai bala pengajar laban ti udah belajalaika pengawa sida enggau manah ke Opis Menteri Pelajar laban ti udah mandangka penyiru enggau penyanyau ngagai bala nembiak sereta mega ngagai bala apai indai ke udah nyukung sereta nganjung anak sida belajar ba tadika nya. “Ngintu sereta ngulih sereta ngemujur utai ke digunaka nya ukai mudah tang begunaka penyakah ke lebih agi maya ke gaduet. Nya begunaka penyakah, apai indai anang enggai kiruh lalu baka nya bala staf enggau pengajar, ku iya.
Beserebak enggau pengerami nya, bisi 49 iku nembiak ke graduet ari tadika nya lalu nembiak ke pemadu nyulut ungkup taun 2014 iya nya Abner Lavan, Alysyia Samantha, Karyna Doe, Nur Azli Syuhada enggau Ezra Jeremiah Tersan.
Reverend Nelson ngarika Presiden Kaunsil Tadika St Thomas Cathedral 2014, The Most Reverend Datuk Bolly Lapok. Bela bisi ngulu pengerami nya The Very Reverend Michael Buma, kaban komiti enggau Kepala Pengajar tadika nya, Alice Prisca Stanley Hill.