KAMI UDAH SEDIA: Wong (tengah) enggau raban UPP bukai sedia ngesan tanggung pengawa nyerakupka bansa Cina sekali agi.
KUCHING: Parti Rakyat Bersatu (UPP) deka nyadi parti ke ngarika komuniti China ba timpuh ke deka datai ngambika ulih nyerakup bansa nya sekali agi pengudah pambar ketegal ubah ba pekara politik.
Presiden (Pengemun) Dato Sri Wong Soon Koh madah, penegap penyerakup komuniti China majak lemi ketegal laya politik entara sida empu.
Bejaku ba sebengkah pengawa malam kena Hari Empat tu tadi, Wong ngasaika parti patut ngesan tanggungpengawa nyerakup rayat ke lebih agi raban bansa China ke diau dalam kandang mengeri.
“Gempuru sida ke udah pambar sereta ratka kaul enggau sida ke udah jauh. Tu meh tuju kitai ke endar,”ku iya rambau Aum Besai Ninting Taun UPP Pampang Pending ti keterubah seraya milih raban ketuai di Indu Opis parti ditu.
Ba taun ke udah, Wong ngasaika rayat ke diau ba kandang mengeri udah majak nyelara diri ari Barisan Nasional (BN) lalu ngadu kaul enggau raban penyakal.
“Tuju parti kitai maya ke diatu iya nya deka ngempuru rayat ke diau dalam kandang mengeri ke lebih agi raban nembiak rebak baru bansa Cina ngambika sida nyukung BN,”ku iya.
Kitai deka bekereja enggau rayat lalu deka meri servis ke pemadu manah ungkup pemaik rayat. UPP deka ngesan tanggungpengawa ngemantupka pinta enggau peneka rayat, tandu iya.
Wong ke mega Menteri Pekara Wang II madah, UPP udah ngatur mayuh program dikena ngerapitka parti nya enggau rayat.
“Kitai patut regas gawa sereta mutarka pemar ke ditapi rayat. Kitai mega deka ngamatka semua semaya ngambika rayat pechaya sereta nyukung kitai ungkup penegap BN,’ku iya.
Bela datai raban komiti besai UPP nyengkaum Menteri Muda Pengerai Mensia Mayuh Datuk Dr Jerip Susil, ADUN Engkilili Johnical Rayong Ngipa, Adun Opar Ranum Mina enggau chairman Pampang Pending, Tan Kay Hock.