KUCHING: Barisan Nasional (BN) patut terus ngereja pengawa nitihka penemu tengahari (moderate) sereta nyakal penemu ke ekstremis.
Kepala Menteri Datuk Patinggi Tan Sri Adenan Satem madahka dalam menua ti diuan pupu raban bansa, mayuh jalai pengarap sereta mayuh adat asal enda patut ngemeran penemu ti ekstremis.
“BN tauka suba Perikatan ulih merintah menua laban kitai bepelasarka penemu tengahari (moderate) dalam ngereja pengawa lalu ukai nitihka penemu ti ekstremis.
“Tang diatu, aku ke udah tuai tu bisi meda penemu enggau ulah ti fanatik tauka ekstrim ari kededua piak lalu bala ke nelap nyadi orang ti dikumbai ngembuan penemu tengahari (moderate).
“Orang fanatik tauka ekstrim enda bejaku ke menua tu. Kitai bejaku ke menua kitai. Penemu tengahari dalam politik udah ngetanka pengelikun menua tu,” ku iya ti mega nyadi Chairman BN Sarawak.
Adenan mansutka pekara tu lebuh bejadika Program Retreat Pemuda BN Malaysia ti diatur Raban Nembiak BN Sarawak ti mungkur semua komponen BN baka Parti Pesaka Bumiputera Bersatu (PBB), Parti Rakyat Sarawak (PRS), Parti Bersatu Rakyat Sarawak (SUPP) enggau (Parti Demokratik Progresif Sarawak) SPDP ba sebengkah hotel ditu, malam ensanus.
Berebak enggau tu Adenan madahka diri berasai temegah ati laban nengeri tu nadai penanggul ekstremis.
“Aku berasai gaga ati lalu madah kami di Sarawak nadai penanggul tu. Engka sida ari Semanjung bisi utai ti tau dipelajarka ari kami.
“Aku enda rinduka leka jaku nyemaka orang baka ‘pendatang’, semua kitai orang Malaysia. Tu ukai menua aku tauka menua nuan, tang menua kitai,” ku iya.
Kelimpah ari nya, lebuh ti ngenang penumbuh Malaysia, Adenan bebendar madahka rayat Malaysia patut nemu Sarawak enggau numbuhka Malaysia tang ukai masuk Malaysia.
Iya madahka Sarawak ti enggau numbuhka Malaysia sebengkah pemutus ti manah.
Nya alai kitai meseti meretika utai ti nyadi suba. Diatu semua nya amat mudah dibandingka enggau kelia, ku iya.
Enti kitai meda sejarah kitai ngelama 50 taun ti udah, kati kitai ngaga pemutus ti manah tauka enda (begulai numbuh Malaysia)? Saut tanya nya sigi au (pemutus ti manah), ku iya.
“Kitai ngaga pemutus ti manah. Aku udah idup di menua tu lebih 70 taun, aku meda baka ni gaya pengidup lebuh diperintah koloni. Aku udah meda gaya pengidup 30 taun suba enggau kediatu di Kuching enggau Sarawak.
“Kitai amat tinggal. Penyauh jalai alun mega ulih dikira enggau tunjuk jari kitai. Ngelama 100 taun kitai diperintah koloni, kitai semina bisi jalai ngemanjai 20 tauka 30 batu. Diatu kitai udah ngaga jalai ba serata menua.
“Nya alai aku madah kitai ngaga pemutus ti manah lalu kitai patut meri terima kasih ngagai bala pemesai ke dulu suba laban bisi penemu sereta visi deka numbuhka Malaysia,” ku iya.
Bisi 350 iku Raban Nembiak BN Malaysia ti mungkur 13 serakup parti BN nyereta program Retreat ti diatur berengkah 21 ngagai 23 November.
Sama datai ba pengerami nya, Chairman Raban Nembiak BN Malaysia ti mega Menteri Nembiak enggau Lumba Khairy Jamaluddin, Ketuai Raban Nembiak BN Sarawak ti mega Menteri Kereja Raya Datuk Seri Fadillah Yusof enggau sida ke bukai.